jenubiy koréye pirézidénti shimaliy koréye pirézidéntining mektubidin xursen bolghanliqini bildürdi

türkiye awazi radiyosi xewiri: jenubiy koréye pirézidénti mon jiyain shimaliy koréye pirézidénti kim jongunning ewetken mektubidin tolimu xursen bolghanliqini bildürdi.

yonhap agéntliqining bu heqtiki xewiride, pirézidént mon jiyainning shimaliy koréye pirézidénti kim jongunning yadro qorallarni bir terep qilish toghrisida bergen wedisini orundaydighanliqini mektubida alahide eskertishidin tolimu xursen bolghanliqi bildürüldi.

mon jiyain pirézidént kim jongunning amérika pirézidénti donald tramp bilen hasil qilinghan kélishimni emeliyleshtürüshke ijabiy pozitsiye tutqanliqini éytti.

kim jongunning yéngi yilda dawamliq uchrishish we koréye yérim arilida tinchliq we parawanliq berpa qilish üchün qilghan chaqiriqigha féysbuk adérisidin jawab qayturghan pirézidént mon jiyain: aldimizda nurghun qiyinchiliq bar, bizmu bularni hel qilish üchün zor tirishchanliq körsitip kéliwatimiz, her ikki terep buninggha ijabiy qarawatidu, dédi.

pirézidént mon jiyain kim jongunning jenubiy koréyeni ziyaret qilish pilanidinmu xursen bolghanliqini alahide eskertip ötti.

jenubiy koréye pirézidéntliq idarisi bayanatchisi kim xuykiyum, shimaliy koréye pirézidénti kim jongunning mektup arqiliq pirézidént mon jiyainning yéngi yilini tebrikligenlikini we koréye yérim arilida tinchliq we parawanliq berpa qilish üchün hemkarlishish niyiti barliqini dégenlikini bildürdi.

jenubiy koréye pirézidénti mon jiyain bilen shimaliy koréye pirézidénti kim jongun, bu yil 27-aprélda  ikki dölet chégrasigha jaylashqan panmunjom oq chiqirishni toxtitish yézisida körüshti.

körüshüshtin kéyin élan qilinghan bayanatta, koréye yérim arilini yadro qoralliridin teltöküs tazilash we oq chiqirishni toxtitish kélishimini uzun muddetlik tinchliq kélishimige aylandurush üchün muzakire ötküzüsh mesiliside kélishim hasil qilinghanliqi uqturuldi.   

ikki koréyening pirézidéntliri bu yil apréldiki uchrishishtin kéyin 26-maydimu yene körüshüp ikki dölet otturisida tinchliq ornitish mesilisi üstide muzakire ötküzdi.

ikki rehber yene séntebirde piyongyangda körüshüp ikki dölet otturisidiki sürkilishni azaytish mesiliside pikir birliki hasil qildi. körüshüshte , ikki dölet otturisida tinchliq ornitish üchün hemkarliq ornitishqa kélishken ikki pirézidént ortaq xitabname élan qildi.

xitabnamide amérika tégishlik qedemlerni tashlighan teqdirde shimaliy koréyeningmu koréye yérim arilini yadro qoralliridin tazilash yolida téximu köp tirishchanliq körsitidighanliqi tekitlendi.