yaponiyening mudapie sahesini kücheytishni pilanlawatqanliqi bildürüldi
yaponiye, döletning eng chong zerbidarlar paraxotini awiyamatkining wezipisini ötiyeleydighan shekilge aylandurushni qarar qildi.
türkiye awazi radiyosi xewiri: yaponiye dölet téléwiziyesi NHK ning xewirige qarighanda, ichki kabinit yighinida yéngi milliy mudapie nizamnamisi qobul qilinghan. nizamnamide, yaponiyening etrapida «éghir» xewpsizlik mesililirining barliqi tekitlengen, xitayning déngizlarda we hawada téz sürette herbiy paaliyetlerni élip bériwatqanliqi, alem boshluqida nopuz yaritishqa tirishiwatqanliqi ilgiri sürülgen.
yéngi mezgilde xitayning bu tirishchanliqlirigha naraziliq bildürülidighanliqi eskertilgen nizamnamide, shimaliy koréyening yadro qorali we ballistik bashqurulidighan bombilirining asasen burunqi halitini saqlap qélip, yaponiyege tehdit bolushni dawamlashturuwatqanliqi tekitlengen.
nizamnamide, yaponiyening 5 yilliq pilanni merkez qilghan yéngi nishanlirighimu orun bérilgen bolup, bu dairide yaponiye köp tereplimilik we bir – birige mas mudapie küchi shekillendüridiken. bu küch hawa, déngiz we quruqluqtin ibaret adettiki saheler bilen birlikte, istratégiyelik jehettin alem boshluqida we siber alem boshluqi saheliride wezipe öteydiken. bu meqsette, yéngi bir alem boshluqi qisimliri qurulidiken we nöwettiki siber alem boshluqi tarmiqining dairisi kéngeytilidiken.
nizamnamide yene tinch okyandiki mudapieni kücheytish üchün, döletning eng chong zerbidarlar paraxoti – izumoning 5 yil ichide dewrning éhtiyajlirini qamdiyalaydighan shekilde bir awiyamatkigha oxshash haletke keltürülüshi telep qilinghan.
buningdin bashqa, 42 dane zamaniwi F-35B we 63 dane F-35A ayropilanining seplinishi kérekliki, asasiy qanundiki «urushtin saqlinish» dégen madda yüzisidin ayropilanlarni «hujum» meqsetlik ishlitishning mumkin emesliki, shunga jiddiy ehwallar bilen meshiq ishlirida ishlitilidighanliqi eskertilgen.
2019 – 2023 maliye yillirini öz ichige alidighan nizamnamide, mudapie chiqimlirining aldimizdiki besh yilda 27 tirilyon yen (240 milyard dollar) ge yétidighanliqi, mudapie ministirliqining 17 milyard dollar etrapida chiqimni téjeydighanliqi élan qilinghan.
