iran awstraliyening quddusqa munasiwetlik qararigha naraziliq bildürdi
iran tashqi ishlar ministirliqi bayanatchisi behram qasimi, awstraliyening, qudusning gherbini israiliyening paytexti dep étirap qilish qararining xelqaraliq kélishimlerge xilap ikenlikini éytti.
türkiye awazi radiyosi xewiri: behram qasimi, islamiy azad uniwérsitéti xewer agéntliqigha bayanat bérip, awstraliyening mezkur qararining «xata shundaqla ubdan hésablanmighan» bir qarar ikenlikini eskertti we buning ishghal astidiki zéminlar we pelestinge alaqidar xelqaraning qararlirigha xilapliq qilish bolidighanliqini bildürdi.
awstraliyening mezkur qedimining pelestin we ottura sherq mesilisining hel qilinishigha hesse qoshmaydighanliqini qeyt qilghan qasimi, bu qararning rayonda sürkilishning ulghiyip kétishini keltürüp chiqiridighanliqini tilgha élip ötti.
awstraliye bash ministiri skot morrison hepte axirida bayanat bérip, hökümitining qudusning gherbini israiliyening paytexti, dep étirap qilishni qarar qilghanliqini uqturghan, elchixanisining israiliye – pelestin tinchliq kélishimi ornitilip bolghuche bu jaygha köchürülmeydighanliqini bildürgenidi.
morrison, qudusning gherbide bir soda we mudapie ishxanisi achidighanliqlirini, elchixana üchün muwapiq jay izdeshning koyigha kiridighanliqlirini sözlirige ilawe qilghanidi.
amérika qoshma ishtatliri pirézidénti donald tramp, 2017 – yili dölitining tél awiwdiki elchixanisini qudusqa yötkeshni qarar qilghan, bu qarar köpligen döletlerde naraziliq peyda qilghan, pelestinde ötküzülgen namayishlarda israiliye eskerliri köp sanda pelestinlikni shéhit qilghanidi.
washington dairiliridin kéyin guatémala we paragway elchixanilirini qudusqa yötkeshni qarar qilghan, biraq paragwayda hökümet özgergendin kéyin mezkur qarar qayturuwélinghanidi.
