misir nopusning köpiyishini tizginleshke teyyarlanmaqta
misir hökümiti, dölet miqyasida nopus istratégiyesi yolgha qoyup 2030 – yilighiche 8 milyon bowaqning kem tughulushini kapaletke ige qilishni pilanlimaqta.
türkiye awazi radiyosi xewiri: misir döletlik nopus kéngishi doklatchisi amir hesen, suweysh shehiride muxbirlarni kütüwélish yighini ötküzüp, sehiye ministirliqining nopus doklatini élan qildi. u, misir nopusining 98 milyongha yetkenlikini, her yili 2 yérim milyon bowaqning dunya kéliwatqanliqini bildürdi.
nopusning köpiyishi mushu süret boyiche dawamlashqan teqdirde 11 yildin kéyin misir nopusining 119 milyongha yétidighanliqini qeyt qilghan hesen, bu muddet ichide dölet nopus istratégiyesini yolgha qoyup, 8 milyon bowaqning az tughulushini kapaletke ige qilishni pilanlawatqanliqlirini we bu siyaset ünümlük bolghan teqdirde, 2030 – yili nopusning 111 milyon bolidighanliqini eskertti.
istratégiyening tepsilati toghrisida melumat bermigen hesen, nopus köpiyishining yoqsulluq, sawatsizliq, bala ishchilar we muddettin burun öylinish qatarliqlar bilen yéqin munasiwiti barliqini qeyt qildi. yene bir tereptin, sehiye ministirliqining mezkur doklatida, misirda 2008 – yili %22 bolghan yoqsulluq nisbiti 2015 – yili %28 ge yetkenliki bildürüldi. minye, esyut, suhaj we qana wilayetliride yoqsulluq nisbiti %50 din éship ketti.
