firansiyede makrongha naraziliq bildürüldi
firansiyening puyén wélay shehiride namayishlarning ziyinini tekshürüp qaytiwatqan pirézidént makrongha qarshi namayish ötküzüldi.
türkiye awazi radiyosi xewiri: firansiyede yéqilghu bahasini chüshürüsh we iqtisadiy sharaitlarni yaxshilash üchün kochigha chiqqan «sériq jilitkiliqlar» teripidin ötküzülgen namayishlarda, shenbe (1-dékabir) küni ot qoyup bérilgen waliy mehkimisining binasida tekshürüshlerde bolghan makron, puyén wélay shehiridin qaytqinida, etraptikilerning naraziliqigha uchridi.
namayishchilar «makron istépa ber» dep shoar towlidi.
«sériq jilitkiliqlar» shenbe küni puyén wélay waliy mehkimisining binasigha atqan molotof sewebidin ot ketken idi.
firansiyede yéqilghu bahasining ösüshi we iqtisadiy sharaitlarning nacharlishishigha naraziliq bildürüp 17-noyabir bashlanghan «sériq jilitkiliqlar» ning namayishi, yéqinqi yillarda firansiyede yüz bergen eng shiddetlik namayishlargha aylinip ketti.
sheher merkizide öy ijarisining qimmet bolushi sewebidin sheher etrapidiki rayonlarda olturuwatqan namayishchilar, makrondin yéqilghu bajlirini chüshürüshni we iqtisadiy sharaitlarni yaxshilashni telep qilmaqta.
paytext parizhning champs-élsis kochisi etrapida 1-dékabir ötküzülgen we minglarche kishi qatnashqan namayishta, saqchilarning qattiq tedbirlerni qollinishi, kochilardiki aptomobil we exlet sanduqlirigha ot qoyup bérishi, magézinlarning bulang-talang qilinishi, awaz bombilirini partlitish we ot tumanlirining kötürülüshi qatarliqlar , sheherni qalaymiqanchiliq ichige sörep kirdi.
namayish sewebidin kochilardiki nurghun qehwexana, magézin we réstoranlar taqalghan bolup, 4-3 milyon yawro ziyan körülgenliki bildürüldi.
namayish bashlanghandin tartip, otturigha chiqqan weqede üch kishi jénidin ayrildi, 222 xewpsizlik xadimini öz ichige alghan 1043 kishi yarilandi, 1424 kishi qolgha élindi.
