islam qurultiyi ishtirakchilirining tamaqliri arisigha choshqa göshiningmu qoyulushi ghulghula peyda qildi

türkiye awazi radiyosi xewiri: 28 – noyabirda gérmaniyening paytexti bérlinda chaqirilghan 4 – nöwetlik gérmaniye islam qurultiyiidiki ziyapette choshqa göshiningmu tamaqlar arisigha kirgüzülgenlikining otturigha chiqishi küchlük ghulghula qozghidi.

gérmaniyediki dölet organliri bilen musulmanlar arisidiki munasiwetni kücheytish we saqliniwatqan mesililerge chare izdesh meqsitide 2006 – yilidin chaqirilip kéliwatqan yighin dairisidiki ochuq réstoran kechlik tamaqlirining arisida choshqa göshiningmu bolushimu naraziliq peyda qildi.

ijtimaiy taratqulardiki inkaslarda, yighinni orunlashturghan gérmaniye ichki ishlar ministirliqi qattiq eyiblendi. lékin, choshqa göshining peqet bu yilla emes, ilgiriki yillardiki tamaqlarning arisidimu barliqi qeyt qilindi.

gérmaniye ichki ishlar ministirliqining ijtimaiy taratqu adrési arqiliq élan qilinghan bayanatta, 13 türlük tamaq sunulghanliqi, bularning arisida halal, köktat, gösh we béliq barliqi bildürüldi.

tzimlikni teyyarlashta ishtirakchilarning oxshash bolmighan dinlarning mensupluqi ikenlikining nezerde tutulghanliqi eskertilgen bayanatta, shundaqtimu «bezi kishilerning diniy tuyghuliri renjide bolghan bolsa, buning üchün epsuslinimiz» déyildi.

bayanatta yene, tamaqlarning türlirining yénidiki qeghezlerge yéziqliq ikenliki, buningdin sirt mulazimetchilergimu tamaqlardin waqiplandurush toghrisida yolyoruq chüshürülgenliki tekitlendi.

ijtimaiy taratqudiki bezi kishilerning, «islam gérmaniyege mensup emes, dégen ichki ishlar ministiridin buningdin bashqini kütkili bolmaydu», «yehudiy qurultiyi bolghan bolsa, oxshash ishni qilalarmidi?», «hörmetsizlik», «setchilik» dégendek inkaslarni yézishi diqqetni tartti.

yene bezi bolsa, yighinning mezmunidinmu bekrek choshqa göshining küntertipke aylinishini eyiblep, mezmungha alaqidar saqliniwatqan mesililerning bu sewebtin xelq arisida qiziqish qozghiyalmighanliqidin shikayet qilishti.