11-qétimliq astana yighini chaqirilidu
11—qétimliq süriye mesilisini muzakire qilidighan astana yighini 28-29-noyabir künliri chaqirilidu.
türkiye awazi radiyosi xewiri: qazaqistan tashqi ishlar ministiri qayrat abdiraxmanow astana yighini toghrisida muxbirlargha bayanat berdi. u kapalet bergüchi döletler bolghan türkiye, rusiye we iranning süriye mesilisi muzakire qilinidighan 11-qétimliq astana yighinini 28-29-noyabir künliri ötküzüshte kélishkenliklirini bildürdi.
qazaqistan tashqi ishlar ministiri qayrat abdiraxmanow yighinni burunqidek kapalet bergüchi döletler, beshshar esed hakimiyiti we qoralliq öktichilerning qatnishishi astida ötküzüshning pilan qilinghanliqini, b d t we iyordaniye wekillirining közetküchilik salahiyitide yighingha ishtirak qilidighanliqini eskertti.
süriyede urush toxtitishni emelge ashurush üchün ötküzülgen 1- qétimliq asta yighini 2017-yili yanwarda chaqirilghan idi. urush toxtitishqa kapaletlik qilghuchi döletler bolghan türkiye, rusiye we iran, beshshar esed hakimiyiti we qoralliq öktichilerning heyetliri bilen astanada toqquz qétim uchrashti. 10-qétimliq astana yighini rusiyening sochi shehiride ötküzüldi. astana yighinliri süriye mesilisini siyasiy yol bilen hel qilish üchün b d t ning nazariti astida dawamlishiiwatqan musapige ijabiy jehettin hesse qoshti. kapalet bergüchi döletler kélishim boyiche, toqunushlar eng köp yüz bériwatqan rayonlarni «jiddiychilikni peseytish rayoni» dep élan qildi. toqunushwatqan terepler görüde tutuwatqan kishilerni qoyup bérish üchün xizmet qilidighan bir guruppa qurdi. astana yighinliri yanwarda sochida «memliketlik diyalog kongresi» ning échilishigha imkaniyet yaritip, asasiy qanun komitétining qurulushi üchün xizmetlerning bashlinishighimu sharait yaritip berdi.
