amérikining gherbiy afriqa istiratégiyesi
amérika qoshma ishtatliri dölet mudapie ministirliqi gherbiy afriqa istiratégiyesini özgertidighanliqini uqturdi.
türkiye awazi radiyosi xewiri: amérika qoshma ishtatliri dölet mudapie ministirliqi teripidin bu heqte élan qilinghan yazma bayanatta, mundaq déyildi: «ministirliqimiz dölet mudapiesi istiratégiyesi höjjitide otturigha qoyulghan muhim pilanlarni qollash meqsitide ashqun zorawan térrorluq teshkilatlirigha qarshi küresh dairiside afriqa qomandanliq ishtabida wezipe ötewatqan xadimliridin texminen % 10 eskerni chékindüridu, dölitimiz afriqidiki hemkarliqini asasiy jehettin saqlap qalidu. zorawan térrorluq teshkilatlirigha qarshi küresh paaliyetliri somali, jibuti we liwiye qatarliq köpligen rayonlarda izchil dawamlishidu. gherbiy afriqigha oxshighan rayonlardiki paaliyetler bolsa, taktikiliq tewsiyeler, yardem, alaqe ornitish we axbarat almashturush teriqiside dawamlishidu.»
melumatlargha qarighanda, amérika qoshma ishtatlirining afriqida 7 ming 200 eskiri bar iken.
amérika qoshma ishtatliri dölet mudapie ministirliqi teripidin bu heqte élan qilinghan yene bir bayanatta, dölet mudapiesi istiratégiyesi höjjitining, xitay we rusiye bilen bolghan riqabet pilanigha mas halda ijra qilinidighanliqi tekitlinip mundaq déyildi: « ministirliqimiz herbiy jehettiki yer shari xaraktérlik üsünlükimizni saqlap qélish üchün dölet mudapiesi istiratégiyesini yolgha qoyush bilen bir waqitta, zorawan térrorluq teshkilatlirigha qarshi küreshte, aldi bilen zémin pütünlüki we halqiliq milliy menpeetlerni bu teshkilatlargha qarshi qoghdash xizmitini muhim orungha qoyuwatidu.»
