li kéchyang: soda urushining ghalibi bolmaydu
xitay bash ministiri li kéchyang, amérika qoshma ishtatliri bilen bolghan soda urushining ghalibi bolmaydighanliqini éytti.
türkiye awazi radiyosi xewiri: xitay bash ministiri li kéchyang, singaporda ötküzülgen 33 – nöwetlik sherqiy jenubiy asiya döletliri ittipaqi bashliqlar yighinining harpisida, amérika bilen dawamlishiwatqan soda urushi, jenubiy xitay déngizi we sherqiy jenubiy asiya döletliri ittipaqi rayoni qatarliqlar toghrisida toxtaldi. u, amérika bilen dawamlishiwatqan soda urushi heqqide, «soda urushida ghelibe qilghan terep yoq. dunya soda zenjiride bashqa döletlerge tesir körsitidighan kélishmesliklerni körüshni xalimaymiz. bir – birimizning tüp menpeetlirige we endishilirige hörmet qilidighanla bolsaq, mesilini hel qilishning bir yoli bolidu» dédi.
u, jenubiy xitay déngizidiki mesililerni hel qilish üchün birlikte heriket qilish lazimliqini eskertip, «jenubiy xitay déngizidiki detalashliq rayonlar mesilisining hel qilinishi yolidiki musapining 3 yil ichide netijilinishini ümid qilimiz. shuning bilen rayonda üzül – késil tinchliq we muqimliq ornitilidu» dédi.
li kéchyang, rayondiki soda munasiwetlirining téximu rawajlandurulushi üchün hemkarliq ornitish lazimliqini qeyt qilip, shundaq qilghanda sherqiy jenubiy asiya döletliri ittipaqi rayonining qanchilik küchlük ikenlikini dunyagha namayan qilghili bolidighanliqini tekitlidi.
xitayning sherqiy jenubiy asiya döletliri ittipaqi rayonidiki bazardiki téximu istratégiyelik halgha keltürüsh üchün tirishiwatqanliqini eskertken li kéchyang, «xitayning sherqiy jenubiy asiya döletliri ittipaqi bazirini janlandurush imkaniyiti bar. buning üchün ishikler keng échilidu we islahatlar téximu keng halette dawamlishidu» dédi.
bügün resmiy bashlinidighan bashliqlar yighinigha 16 döletning rehbiri ishtirak qilidu. sherqiy jenubiy asiya döletliri ittipaqigha eza 10 dölettin bashqa xitay, hindistan, yaponiye, jenubiy koréye, rusiye we awstraliye rehberlirimu yighingha qatnishidu. yighinda, jenubiy xitay déngizi, rayon xaraktérlik iqtisadiy shérikchilik, arakanliq musulmanlar mesilisi bilen géopolitik we iqtisadiy özgirish basquchining yol xeritiliri muzakire qilinidu.
sherqiy jenubiy asiya döletliri ittipaqining qurghuchi ezaliri hindonéziye, malayshiya, tayland, filippin we singapor bilen birunéy, wiyétnam, laos, birma we kambodzha qatarliq jemiy 10 ezasi bar.
