seudi erebistan padishahining inisi shahzade ehmed dölitige qaytti

türkiye awazi radiyosi xewiri: seudi erebistan padishahi selman bin abdulezizning engliyening paytexti londonda yashaydighan qérindishi shahzade ehmed bin abduleziz, zhurnalist jemal qashiqji (xashiqji) ning dölitining istanbuldiki konsulxanisida öltürülüshi bilen otturigha chiqqan kirizistin kéyin dölitige qaytti.

nyu york waqti gézitining xewer qilishiche, padishah selmanning eng axirqi hayat qérindishi shahzade ehmed, dem élish künlirini ötküzüwatqan londondin riyadqa qaytqan.

shahzade ehmedning qaytishigha, qashiqjining öltürülüshide rol oynighan bolush éhtimalliqi tüpeyli xelqaraning naraziliqigha duch kelgen padishah selmanning oghli, text warisi shahzade muhemmed bin selmanning nopuzini tengshesh yolida tashlanghan bir qedem bolushi mumkin, dep qaralmaqta.

padishah abdulezizning husse bint ehmed essudeyridin bolghan 7 oghul perzentining axirqisi bolghan shahzade ehmed, padishah ailisidiki nopuzi küchlük kishilerning biri bolup, yette bir tughqan ichidiki textke olturmighan birdinbir shahzadidur.

seudi erebistanning warisliq enenisi boyiche, text warisliqi yash jehettiki perqige asasen chongdin kichikke dawamlishidu, biraq padishah selmanning oghli muhemmed bin selman padishahliq tarixida tunji qétim text warisi shahzade, dep élan qilinghan we emeliy jehettin padishahliqni öz aldigha bashquridighan halgha kelgenidi.

buningdin ilgiri ichki ishlar ministiri yardemchisi bolup wezipe ötigen 76 yashliq shahzade ehmed bolsa, dem élish waqitlirini londonda ötküzmekte idi.

istanbul jumhuriyet bash teptish mehkimisi tünügün bayanat bérip, «öltürülgüchi jemal qashiqji, 2018 – yili 2 – öktebirde nikah resmiyetlirini hel qilish üchün kirgen seudi erebistan padishahliqining istanbuldiki konsulxanisida – aldin tüzülgen pilangha asasen – konsulxana binasigha kirer – kirmeyla boghulup öltürülgen. jesiti, yene aldin pilanlanghini boyiche, parchilinip yoqitip tashlanghan» dégenlerni qeyt qilghanidi.