jenubiy sudanda 20 ming kichik bala ölüp kétishi mumkin
jenubiy sudanda 20 ming kichik balining yil axiridin burun ozuq yétishmeslik sewebidin jénidin ayrilishi mumkinliki élan qilindi.
türkiye awazi radiyosi xewiri: xelqaraliq balilarni qoghdash teshkilati jenubiy sudandiki balilarning ehwali toghrisida bayanat élan qildi.
bayanatta, ichki urushlar peyda qilghan sewebler tüpeylidin jenubiy sudanda 1 milyondin artuq kichik bala we 6 milyondin artuq kishining yémek-ichmekke jiddiy éhtiyajining barliqi bildürüldi.
bayanatta mundaq déyildi:
«270 ming kchiik bala acharchiliq xewpi astida. texminen 20 ming bala 2018-yilning axiridin burun acharchiliq sewebidin ölüp kétishi mumkin.»
balilarni qoghdash teshkilatining jenubiy sudandiki diréktori déydré kéof: «insanperwerlik xizmetlirining dawamlishishi we köpeytilishi üchün derhal maddiy yardem qilinmisa, nurghun kichik bala ölüm xewpi astida qalidu» dédi.
u ichki urushning eng éghir aqewetlirige duch kelgenlerning kichik balilar ikenlikini eskertip, insanperwerlik yardemlirige érishishni asanlashturushni chaqiriq qildi.
sudandin 2011-yili ayrilip musteqil bolghan jenubiy sudanning pirézidénti salwa kiir mayarditning 2013-yili 16-dékabir muawin pirézidént riyék macharni «herbiy özgirish qozghimaqchi» bolghanliqini ilgiri sürüp wezipisidin élip tashlishi, döletni ichki urush qaynimigha sörep kirgen idi. tereplerning bir qanche qétim tinchliq uchrishishliri netijiside, tinchliq we urush toxtitish kélishimi imzalighan bolsimu, emma qaytidin urush partlighan idi.
axirqi qétim 12-séntebir éfiyopiyede ötküzülgen dölet we hökümet bashliqliri yighinida körüshken pirézidént mayardit bilen öktichi rehber machar tinchliq kélishimi imzalighan idi. jenubiy sudandiki ichki urush onminglarche kishining jénidin ayrilishigha, milyonlarche kishining öy-makanliridin ayrilishigha seweb boldi.
