wéngiriye taratquliri jumhur reis erdoghanning ziyaritige keng orun ajratti
wéngiriye taratquliri jumhur reis rejep tayyip erdoghanning 8 – 9 – öktebir künliri wéngiriyege qilghan resmiy ziyaritige keng orun ajratti.
türkiye awazi radiyosi xewiri: wéngiriyede chiqidighan dangliq gézitlerdin biri bolghan «‹ magyar idök › géziti», jumhur reis erdoghanning ziaritige alaqidar xewiride, wéngiriye bash ministiri wiktor orbanning «türkiyening muqimliqi bizge paydiliq» teriqisidiki sözlirini serlewhe qilip élan qildi.
jumhur reis rejep tayyip erdoghanning ziyariti dairiside wéngiriye pirézidénti janos adér, bash ministiri wiktor orban, parlamént bashliqi lazislo köwér bilen bir yerge jem bolghanliqi eskertilgen xewerde, jumhur reis erdoghanning budapéshttiki osmanli impériyesi dewrige ait yadikarliqlardin «gül baba meqberisi» ning échilish murasimigha qatnashqanliqi qeyt qilindi.
gézitning xewiride yene, wéngiriye bash ministiri wiktor orbanning jumhur reis rejep tayyip erdoghanning ziyariti toghruluq toxtalghanda qilghan munu sözi neqil keltürüp mundaq déyildi: «wéngiriyening bixeterliki türkiye bilen biwasite munasiwetliktur. türkiyede küchlük bir hökümetning hakimiyet béshida bolushi wéngiriyeningmu bixeterlikining kapaliti hésablinidu. derweqe, türkiyemu wéngiriyege oxshashla köchmenlik yolliri üstige jaylashqan bir dölet bolup, türkiyening rayonda tinchliq ornitalighudek küchlük hakimiyet qurulmisigha ige bolushi hemde qanunsiz köchmenlikni rayondin yiraqlashturush iqtidarigha ige bolushi bizge nisbeten nahayiti zor ehmiyetke ige. türkiyening yawropa bilen hasil qilghan köchmenlik kélishimimu nahayiti muhimdur. bizning türkiyege qarita hemkarliqimizni ochuq - ashkara halda namayen qilish mejburiyitimiz bardur. milyonlarche köchmenni baghrigha basqanliqi üchün türkiyege rehmet éytiish bizning eng eqelliy insaniy burchimizdur. türkiyening yawropa bilen tüzgen kélishimi yawropa qitesining bixeterliki üchün nahayiti zor ehmiyetke ige. türkiye dunya boyiche iqtisadiy jehettin eng küchlük qudretlik döletlerdin biridur. shunga wéngiriye türkiyening dunya boyiche iqtisadiy eng küchlük 10 dölet qataridin orun élish nishanigha hergizmu sel qariyalmaydu.»
wéngiriyediki tesiri eng küchlük téléwiziye qanalliridin biri bolghan «‹ Hir TV › téléwiziye qanili» ning intérnét tor bétide, wéngiriye bash ministiri wiktor orbanning jumhur reis rejep tayyip erdoghanning ziariti toghruluq qilghan sözi neqil keltürülüp élan qilinghan «hem wéngiriye hem türkiye küchlük hökümetlerge ige» serlewhilik xewiride, wéngiriyening türkiyening yawropa ittipaqigha ezaliqini qollaydighanliqi, jumhur reis erdoghanning bu qétimqi ziyaritide, bash ministir wiktor orbanning wéngiriyening bu heqtiki pozitsiyesini namayen qilghanliqi tekitlendi.
