herbiy öktichiler aldinqi septin éghir tipliq qorallarni chékindürüshni bashlidi

türkiye awazi radiyosi xewiri: erkin süriye armiyesi küchliridin teshkil tapqan süriye memliketlik erkinleshtürüsh firontining bayanatchisi naji mustapa, herbiy öktichilerning sochi kélishimining rohigha asasen idlib aldinqi sépidin éghir tipliq qorallarni chékindürüshni bashlighanliqini éytti.

beshshar esed hakimiyitining qilghusi hujumliri nezerde tutulup aldinqi septe yinik tipliq qorallarning qaldurup qoyulidighanliqini, xendek kolash we istihkamlarni yasash xizmetlirining dawamlashturulidighanliqini eskertken bayanatchi, «éghir tipliq qorallarning chékindürülüshi türk emeldarlarning kordinatsiyesi astida ishqa ashurulmaqta» dédi.

jumhur reis rejep tayyip erdoghanning 7 – séntebirde téhranda chaqirilghan bashliqlar yighinida otturigha qoyghan teklipige binaen, erdoghan bilen putin 17 – séntebirde rusiyening sochi shehiride körüshüp, urush toxtitishni saqlap qélish, hetta uni kücheytishke alaqidar mesililer boyiche kélishim hasil qilghanidi. kélishim, 15 – öktebirgiche 15 bilen 20 kilométirliq rayonda qoraldin xaliylashturulghan rayon tesis qilip, u yerni türk we rus eskerlerning kontrol qilishi qatarliqlarni mezmun qilidu؛ herbiy öktichiler, heyeti tehrirushsham (demeshqni azad qilish heyiti), hakimiyet eskerliri we uni qollighuchi chet ellik térrorchi guruppilarning aldinqi sep boyiche chongqurluqi jughrapiyelik shert – sharaitqa qarap belgilinidighan qoralsizlinish rayonidiki éghir tipliq qorallarni chékindürüshi shert qilinidu. éghir tipliq qoralliri bilen birlikte rayondin chiqip ketken terepler, kontrol qiliwatqan jaylarning chégralirini özliri qoghdashni dawamlashturidu.

kapaletchi döletler türkiye bilen rusiye, mesuliyitini üstige alghan qoralsizlinish rayonlirida özara maslashqan halda charlash xizmetlirini élip baridu.