chawushoghlu wénézuélada
tashqi ishlar ministiri mewlüt chawushoghlu wénézuélada dölet ishliri ziyaritide bolmaqta.
türkiye awazi radiyosi xewiri: wénézuélaning paytexti karakasta wénézuéla tashqi ishlar ministiri jorj arréaza bilen bir yerge jem bolghan chawushoghlu, bu yerde qilghan sözide, jumhur reis rejep tayyip erdoghanning soda ishlirining milliy pullar arqiliq ishqa ashurush chaqiriqining muhimliqini yene bir qétim tekitlep mundaq dédi: «amérika qoshma ishtatliri hökümiti dollarni bir hujum wasitisigha aylanduruwalghanliqi üchün, bashqa döletlermu özara soda ishlirida yerlik pullarni ishlishni oylishiwatidu. pullar bashqa döletlerning iqtisadigha hujum qilish wasitisi süpitide ishlitilmesliki kérek.»
wénézuéla bilen bolghan soda munasiwetliride yerlik pullarni ishlitishni xalaydighanliqlirini éytqan chawushoghlu, mundaq dep körsetti: «soda munasiwetlirimizde peqet wénézuéla bilenla emes, bashqa döletler bilenmu yerlik pullarni ishlitishni xalaymiz. dölitimiz yéqinda amérika qoshma ishtatlirining iqtisadiy jehettiki hujumigha uchridi, emma türkiye özining milliy siyasiti we küchlük istiratégiyesining türtkiside bu hujumgha taqabil turdi. dölitimiz nöwette iqtisadiy tereqqiyatni muqim halette dawamlashturush meqsitide birqatar tedbirlerni aldi. dölitimiz bilen bashqa döletler ara hemkarliq sayisida bu qiyin ötkeldin muweppeqiyetlik halda öteleydighanliqimizgha ishinimen.»
chawushoghlu kéyinche wénézuéla muawin pirézidénti déli rodriguéz we wénézuéla pirézidénti nikolas maduro teripidin qobul qilindi.
maduro bilen élip barghan uchrishishi heqqide toxtalghan chawushoghlu, «ikki dölet otturisidiki qérindashliq munasiwetlirimizni biz nöwette bashtin kechürüwatqan musheqqetlik künlerde téximu mustehkemleymiz. biz qandaq bolushidin qetiynezer, hemishe wénézuéla döliti hem xelqining yénida bolimiz» dédi.
