yawropa ittipaqi idlib mesilisi toghruluq agahlandurush berdi
yawropa ittipaqi tashqi munasiwetler we bixeterlik siyasetliri alahide wekili fédérika moghérini süriyening idlib rayonigha herbiy hujum qilinghan teqdirde milyonlarche puqraning xewpke duch kélidighanliqi toghruluq agahlandurush berdi.
türkiye awazi radiyosi xewiri: fédérika moghérini birleshken döletler teshkilati süriye alahide wekili staffan dé mistura bilenmu téléfonda körüshkendin kéyin élan qilghan yazma bayanatida, süriyede uda 7 yildin buyan dawamlishiwatqan urushning milyonlarche insangha nisbeten éytip tügetküsiz derd – elemlerge seweb bolghanliqini tekitlep mundaq dédi: «nöwette biz idlibte weziyetning téximu yamanliship kétish xewpige duch kéliwatimiz. shunga, bu xewpning aldini élishimizgha toghra kélidu. bolmisa, hujum qarari chiqarghanlar yaki buninggha yol qoyghanlar tarix aldida we xelqning neziride jawabkarliqqa tartilidu.»
süriyening nahayiti sezgür bolghan idlib rayonigha herbiy hujum qilinghan teqdirde, milyonlarche puqraning xewpke duch kélidighanliqi, 3 milyondin artuq puqraning palaket girdabigha ittirilidighanliqi toghruluq agahlandurush bergen fédérika moghérini, buning yéngi bir pajieni keltürüp chiqiridighanliqini hemde sürkilishni téximu keskinleshtürüwétidighanliqini eskertti.
yawropa ittipaqining süriyede birleshken döletler teshkilati bashchiliqida kirizisni siyasiy yollar arqiliq hel qilish tirishchanliqlirini qollap kéliwatqanliqini eskertken moghérini, astana kapaletchilirini puqralarni qoghdash mesilisini eng muhim xizmet küntertipige kirgüzüshke chaqirdi.
