donald tramp we aqsaray heqqide yézilghan kitab talash - tartish peyda qildi

türkiye awazi radiyosi xewiri: amérikining washington pochta gézitide kitabning bezi bölümliri élan qilinghan bolup, pishqedem yazghuchilardin bob wudwardning «qorqunch؛ aqsarayda tramp» namliq kitabi amérika xelqi arisida yéngi talash – tartishlarning derwazisini achti.

donald tramp bilen meslihetchiliri arisida nurghunlighan mesililerde jiddiy ixtilaplar we maslashmasliqlar barliqi ilgiri sürülgen mezkur kitabta, trampning alahide alaqe mudiri réyns pirébusqa qaratqan halda: «aqsaraydiki nurghunlighan kishi bir – birige yirtquchlarche muamile qilishidu» dégen ibarilerni ishletkenliki bayan qilinidu.

jemiy 448 betlik kitabta yene, tramp teyinligen we hazirmu edliye ministirliqi wezipisini dawamlashturuwatqan jéf sésshenske qaritamu: «nirwa késili bar, hamaqet bir jenubluq» dégen ibarilerni ishletkenliki bildürülidu.

kitabta, tramp teripidin soda ministirliqigha teyinlengen wilbur rusqa donald trampning biwaste halda: «sanga ishenmeymen, buningdin kéyin muzakirilerge qatnishishingnimu xalimaymen» dégenliki ilgiri sürülidu.

kitabta yene, tirampning süriyede 2017 - yilidiki ximiyelik hujumdin kéyin, beshshar esed üchün «u lenetlik qatilni öltüreyli! ichkirilep kirip bularning köpinchisini öltüreyli!» dégenlikimu ilgiri sürülidu.

yazghuchi wudwarning bildürüishiche, tramp yene 2017 – yili iyul éyidiki bir dölet bixeterlik kéngishi yighinida, yéghin zalidikilerge naraziliq bildürüp: «afghanistanda meydanda urush qiliwatqan eskerler bu ishlarni silerdin téximu yaxshi qilatti. biz bu yerde qandaq bimeniliklerni qiliwatimiz? yene qanchilik adimimiz ölidu? qachanghiche u yerde turimiz?» dégenliki qeyt qilinidu. 

donald tramp hökümiti astidiki aqsarayda estayidil bir maslishishchanliq we tertip – tüzüm yoqluqi ilgiri sürülgen kitabta yene, tramp bilen bezi muawinliri otturisidimu nurghunlighan mesililerde haqaretlik sözlerni ishlitish derijiside ziddiyet barliqi bayan qilinidu.

kitabning 11 - séntebir küni bazargha sélinishi mölcherlenmekte.

kitabqa aqsaraymu qattiq naraziliq bildürülgen bolup, aqsaray bayanatchisi sara sandérs kitab heqqide élan qilghan yazma bayanatida, kitabta nurghunlighan oydurma hékayilerning barliqini we xataliqlar bilen tolup tashqanliqini ilgiri sürdi.

aqsaray bayanatchisi sara sandérs: «bu kitabning asasliq köp qismi bezi renjip qalghan sabiq xadimlarning sözlirini asas qilghan halda oydurulghan hékayilerdin bashqa nerse emes. hemmisi pirézidéntni yaman körsitishni nishan qilidu» dédi.

mshél wolf teripidin yézilghan «ot we ghezep؛ tramp aqsarayning ichidin» namliq yene bir kitabmu amérika pirézidénti donald trampning pirézidéntliq wezipisini tapshurup alghan tunji yilini mezmun qilghan bolup, dékabirda qattiq talash - tartish peyda qilghan idi. hetta donald tramp bu kitabning neshir qilinmasliqi üchün neshriyatqa agahlandurush mektubi yollighan idi.