yemen insan heqliri ministirliqi b d t ni heriketke ötüshke chaqirdi

türkiye awazi radiyosi xewiri: yemen insan heqliri ministirliqi birleshken döletler teshkilatigha qarashliq insan heqliri aliy komissarliqi ishxanisini senadin waqitilq paytext adenge yötkesh kéreklikini bildürdi.

yemen resmiy xewer agéntliqining bu heqtiki xewirige asaslanghanda, insan heqliri ministirliqi birleshken döletler teshkilatigha qarashliq komissarliqlar we bashqa xelqara teshkilatlarning ishxanilirining shie husiylarning tizgini astidiki senada qélishining tolimu xeterlik ikenlikini bildürüp bayanat élan qilghan.

shie husiylarning senada b d t we bashqa teshkilat xadimlirining weziplirini ada qilishgha tosalghu bolup kéliwatqanliqi bildürülgen ministirliqning bayanatida, teshkilatlarning senada dawamliq qélishining insaniy we qanuniy paaliyetlerni xeterlik ehwalgha chüshürüp qoyidighanliqi tekitlendi.

bayanatta insan heqliri ministirliqining waqitliq paytext adende b d t qatarliq xelqara teshkilatlarning xadimliri bilen masliship xizmet qilishi üchün sharait berpa qiliniwatqanliqi eskertildi.

shie husiylarning senada insan heqliri aliy komissarliqi xadimlirining nazaret astidikilerni yoqlishigha ruxset qilmaywatqanliqimu bildürülgen bayanatta yene,  xelqara teshkilatlar türmilerdiki qiyin-qistaqlarni cheklesh we qoralliq toqunushlargha balilarni qatnashturmasliq mesiliside shie husiylargha yéterlik bésimlarni ishlitelmeslik bilen eyiblendi.

uzundin buyan siyasiy muqimsizliqlargha sehne boliwatqan yemende qanunluq hökümetni aghdurup tashlighan shie husiylar, 2014-yili séntebirdin buyan paytext sena we bezi rayonlarning tizginini changgilida tutmaqta.

seudi erebistan bashchiliqidiki xelqara ittipaqdash qisimliri 2015-yili marttin buyan yemen hökümitini qollap kelmekte.