seudi erebistan kanadadin arpa we bughday import qilishni toxtatti

türkiye awazi radiyosi xewiri: roytérz xewer agéntliqi, seudi erebistan danliq mehsulatlar orgini danliq mehsulat éksportchilirigha resmiy höjjet chüshürüp, «kanadadin arpa we bughday sétiwélishning toxtitilidighanliqi» ni uqturdi.

mezkur höjjette, «seudi erebistan danliq mehsulatlar orgini 2018 – yili 7 – awghusttin bashlap, kanadada ishlepchiqirilghan bughday we arpa importini qobul qilmaydu» dégen ibarilerge orun bérildi.

kanada hökümiti qarmiqidiki istatistika agéntliqining sanliq melumatlirigha asaslanghanda, kanada qattiq bughdaydin bashqa seudi erebistangha 2017 – yili 66 ming tonna bughday, 132 ming tonna arpa satqan.

seudi erebistan danliq mehsulatlar orginining 625 ming tonna bughday sétiwélish üchün 16 – iyulda achqan xelqaraliq höddigerler tizimlikide kanada küchlük orunni igilimekte.

kanadaning seudi erebistan xewpsizlik tarmaqlirining bezi kishilik hoquq paaliyetchilirini nazaret astigha élishigha qarita élan qilghan bayanatliri, ikki dölet arisida diplomatik kirizis peyda qilghanidi.

kanadaning pozitsiyesige «ichki ishlirigha arilishish» dep baha bergen seudi erebistan, aldinqi küni kanadaning riyadta turushluq bash elchisini xalanmighan adem, dep élan qilghanliqini, dölet tewelikidin chiqip kétishi üchün 24 saet möhlet bérilgenlikini we kanada bilen bolghan barliq soda munasiwetlirini toxtatqanliqini uqturghan, shuningdek buninggha qoshumche qilip, kanada bilen maarip, oqush puli mukapati we oqughuchi almashturush pilanliriningmu toxtitilghanliqini bildürgenidi.

riyad dairiliri yene, bu dairidiki qararlargha ilaweten seudi erebistan hawa yolliri shirkitining 13 – awghusttin bashlap kanadaning toronto shehirige qatnaydighan ayropilan seperlirini tonglitidighanliqini qeyt qilghanidi.

kanada tashqi ishlar ministiri kiristia friland, riyad bash elchisining xalanmighan adem, dep élan qilinghanliqidin chongqur qayghurghanliqini bildürgenidi.

merkizi amérikigha jaylashqan médiya orgini blumbérgning bildürüshiche, seudi erebistanning 2006 – yilidin buyanqi kanada shirketliridiki sélinmisi 6 milyard dollargha yétidiken.