amérika tashqi ishlar ministirliqi émbargo heqqide melumat berdi
amérika tashqi ishlar ministirliqining yuqiri derijilik emeldarliri, donald tramp hökümitining irangha qarshi qattiq shekilde yürgüzidighan émbargolarning iran iqtisadigha chong tesir körsitidighanliqini bildürdi.
türkiye awazi radiyosi xewiri: amérika tashqi ishlar ministirliqining munasiwetlik mesul emeldarliri pirézidént tramp iran bilen yadro kélishimidin öz aldigha chékingendin kéyin, bügün (7-awghust) enqere waqti etigen saet 07:00, ürümchi waqti 10:00 da ijra qilinishqa bashlighan émbargolarning birinchi basquchi heqqide melumat berdi.
«bu émbargolarning pul-muamile nuqtisidin iran iqtisadigha qattiq tesir körsitidighanliqigha héchqandaq guman yoq» dégen mesul emeldarlar, meqsetlirining iranda héchqandaq hakimiyet özgirishini keltürüp chiqirish emeslikini ilgiri sürgen halda: «iranning pozitsiyesini özgertishini kütimiz, nishanimiz tüzüm özgertish emes» dédi.
mesul emeldarlar amérikaning irangha qarshi yolgha qoyghan émbargolar toghrisida otturigha chiqqan «dunyawi birleshme hasil qilalmidi» dégen tenqidler üstide toxtaldi we mundaq dédi:
«iranning yaman niyetlik pozitsiyesige qarshi dunyawi birleshme hasil qilishqa tirishiwatimiz. shuni ochuq éytalaymizki, hoquqlirimizdin toluq paydilinip, bu mesilige munasiwetlik pirézidént qararini qattiq ijra qilmiz. bashqa döletler bilenmu buni ijra qilishliri üchün söhbet ötküzimiz. biraq, héchkim hoquqlirimizdin toluq paydilinidighanliqimizdin qilche guman qilmisun.»
2015-yili iyulda 20 ay dawamlashqan muzakireler netijiside, iran bilen b d t xewpsizlik kéngishige daimiy eza besh dölet (amérika, engliye, firansiye, rusiye, xitay) we gérmaniyedin teshkil tapqan alte dölet otturisidayadro kélishimi imzalanghan idi.
kélishim boyiche, téhranning yadro pirogrammisini axirlashturush bedilige, yolgha qoyuluwatqan xelqaraliq émbargolar emeldin qaldurulatti.
biraq, 2018-yili may éyida amérika pirézidénti donald tramp yadro kélishimidin öz aldigha chékingendin kéyin, amérika maliye ministirliqi irangha 90 künlük we 180 künlük ikki basquch bilen yolgha qoyulidighanliqini élan qilghan idi.
