seudi erebistan bilen kanada arisida kirizis kélip chiqti
seudi erebistan kanada hökümiti bilen bolghan soda munasiwitini tonglitip qoyghanliqini jakarlidi.
türkiye awazi radiyosi xewiri: seudi erebistan kanada elchisini «xalanmighan kishi»élan qilip, 24 saet ichide chégradin chiqip kétishke möhlet bérish bilen birge, kanada bilen bolghan soda munasiwitinimu tonglitip qoydi.
seudi erebistan bixeterlik tarmaqlirining bezi insan heqliri paaliyetchilirini nazaret astigha élishigha qarita kanada hökümiiti naraziliq bildürüp bayanat élan qildi, bu ehwal ikki dölet arisida diplomatik kirizis peyda qildi.
seudi erebistan tashqi ishlar ministirliqi teripidin élan qilinghan bayanatta, kanadaning riyadta turushluq elchisi dénnis horakning «xalanmighan kishi»élan qilinghanliqi we chégradin 24 saet ichide chiqip kétishi kérekliki bildürüldi.
kanada bilen bolghan soda munasiwetliri we sélinmilarning tonglitip qoyulghanliqi eskertilgen bayanatta, mezkur qararning kanada tashqi ishlar ministiri kiristiya firélend we kanada elchixanisining seudi erebistanda nazaret astigha élinghan paaliyetchilerning derhal qoyup bérilishi lazimliqi toghrisida bayanat élan qilishigha qarita naraziliq meqsitide chiqirilghanliqi alahide tekitlendi.
kanadaning bu pozitsiyesining «seudi erebistan hökümitining ichki ishlirigha ochuq arilishish bolidighanliqi»alahide eskertilgen bayanatta mundaq déyildi: «kanadaning bayanatidiki <derhal qoyup bérilsun>dégen ibare döletler ara munasiwetlerde tolimu éghir we eyibleshke tégishlik ibarilerdin biridur. seudi erebistan padishahliqi tarixtin béri ichki ishlargha arilishidighan ishlargha qetiy qarshi turup keldi, buningdin kéyinmu qarshi turidu. hökümitimiz kanadaning bu pozitsiyesini ichki ishlargha arilashqanliq dep qaraydu, igilik hoquqimizgha dexli bolidighan bu ishqa tégishlik jawabni qayturimiz.»
kanada tashqi ishlar ministiri firélend, 2-awghustta twittér adrésida mundaq mezmunda uchur yazghanidi: «rayif bedewining singlisi semer bedewining seudi erebistanda nazaret astigha élinishidin tolimu epsuslandim, kanada bedewi ailisini bundaq qiyin künlerde yalghuz tashlap qoymaydu, semer bedewi qoyup bérilgüche diplomatik xizmetlerni dawamlashturimiz.»
buningdin bashqa kanada tashqi ishlar ministirliqining resmiy twittér adrésidin 3-awghustta tarqitilghan uchurdimu mundaq déyilgenidi: «kanada hökümiti semer bedewi bolup seudi erebistandiki barliq ammiwi teshkilat we insan heqliri paaliyetchilirining nazaret astigha élinishidin tolimu biaram boldi. seudi erebistan hökümitini bu insanlarni derhal qoyup bérishke chaqirimiz.»
