yaponiye kanadadin bughday import qilishni qayta bashlidi
yaponiye hökümiti kanadadin bughday import qilishni qayta bashlighanliqini bildürdi.
türkiye awazi radiyosi xewiri: yaponiye kanadadin import qilidighan bughdaygha qoyulghan waqitliq cheklimini bikar qildi.
kanada yéza-igilik we ashliq ministiri lawréns makawlay bilen xelqara soda ministiri jim kar qoshma axbarat élan qilish yighini ötküzüp, yaponiye yéza-igilik ministirliqining bu heqte bayanat élan qilghanliqini bildürdi.
yaponiyening kanadadin import qilinidighan bughdaygha qoyulghan waqitliq cheklimini bikar qilghanliqi eskertilgen bayanatta mundaq déyildi: «kanada hökümiti yaponiye yéza-igilik ministirliqining ilmiy xizmetlirini tamamlighandin kéyin kanadadin import qilinidighan bughdaygha qoyulghan waqitliq cheklimini bikar qilishidin tolimu xursen boldi. yaponiye yéza-igilik ministirliqining bu qarari kanada bughdiyining süpitining yuqirliqini yene bir qétim delillidi.»
kanadaning jenubiy albérta rayonida élip bériliwatqan génliri özgertilgen bughday sodisigha xatime bérilgenliki eskertilgen bayanatta, kanadaning bughday éksport qilishta dunya boyiche aldinqi qatarda turidighanliqi bildürüldi.
yaponiye yéza-igilik ministirliqi bu yil iyunda kanadaning jenubiy albérta rayonida génliri özgertilgen bughday sodisining élip bériliwatqanliqini seweb qilip, kanadadin bughday import qilishni waqitliq toxtitip qoyghanidi.
kanada dairiliri ziyanliq otlarni bir terep qilish üchün rayonda élip bérilghan ziraetlerge dora chéchish xizmetliri sewebidin mesile kélip chiqqanliqini bildürüp yaponiye hökümitige chüshenche bergenidi.
génliri özgertilgen bughdayning dunya miqiyasida soda meqsetlik ishlitilishige ruxset qilinmaydu.
kanada we amérikida génliri özgertilgen bughday üstide sinaqlarning élip bériliwatqanliqi bildürülmekte.
kanada miqiyasidiki 22 milyon gégtarliq térilghu jayda yilda 30 milyon tonniliq bughday ishlepchiqirilidu we bashqa döletlerge yilda 6 milyard 600 milyon dollar qimmitide bughday éksport qilinidu.
