engliye rusiyege qarshi kürishini dawamlashturidighanliqini bildürdi

türkiye awazi radiyosi xewiri: bash wezir tirésa méy amérika pirézidénti donald tramp bilen rusiye pirézidénti wladimir putinning finlandiye paytexti xélsinkida ötküzgen axbarat élan qilish yighini toghrisida engliye parlaméntining töwen qaniti bolghan awam palatasida söz qildi.

u ötken hepte bélgiye paytexti biryussélda ötküzülgen nato aliy rehberler yighinigha ishtirak qilghanliqini xatiriletken halda rusiye bilen, u peyda qilghan tehditlerni muzakire qilghanliqlirini éytti.

bash wezir tirésa méy mart éyida we buningdin bir hepte burun gherbke jaylashqan salisburiy bilen etrapida yüz bergen zeherlesh weqeliri üstide alahide toxtilip, bularning dunyawi ölchemlerge we qanunlargha nisbeten rusiyening barghanséri küchiyiwatqan perwasizliqigha misal ikenlikini ilgiri sürdi.

u ximiyelik zeherlinishtin bashqa, gherb démokratiyelirining putigha palta chépish we dunya miqyasidiki menpeetlirige ziyan sélish üchün yaxshi teyyarliq qilghan pozitsiye ülgisining yene bir xilini teshkil qilidighanliqini eskertti.

u yéqinqi yillarda rusiyening irangha qoral sétishni köpeytkenlikini, beshshar esed hakimiyitining ximiyelik qoral ishlitishige chiragh yéqip bergenlikini we iqtisadiy nuqtidin ziyanliq bolghan siber hujumi qilghanliqini, yalghan xewerler tarqatqanliqini ilgiri sürüp, uzun muddetlik nishanlirining rusiye bilen mesilini hel qilidighan munasiwet ornitish sheklide dawamlishiwatqanliqini bildürdi.

bu sewebtin tünügün (16-iyul) emelge ashqan tramp-putin uchrishishidin memnunluq hés qilghanliqini eskertti we mundaq dédi:

"biraq, ötken hepte pirézidént tramp bilen körüshkende déyishkinimizdek, mezkur mesilini birlikte we küchlük iradimiz bilen qilishimiz kérek. bu rusiyening pozitsiyesini özgertish mesiliside ochuq we tewrenmes bolush menisige ige. menpeetlirimizni we meniwi bayliqlirimizni ajizlitishta ching turghanche, rusiyege qarshi küreshni dawamlashturushimiz kérek. biz del buni qilimiz" dédi.

biryusséldiki nato aliy rehberler yighinida élan qilinghan xitabnamide, salisburiy hujumi eyiblendi. engliyening hujumgha rusiyening jawabkar bolush éhtimali chong, dégen xulasisi nuqtidin natoning engliye bilen zich hemkarliq ichide ikenliki qeyt qilindi.

engliye aralda yüz bergen zeherlinishlerde rusiye teripidin yasalghanliqi ilgiri sürülgen herbiy xususiyetke ige nérwa sistémisigha küchlük tesir körsitidighan maddilarning jezmleshtürülgenlikini élan qilghan idi. bu maddilarning sabiq sowét ittipaqi teripidin 1970- we 1980-yillarda yasalghan "nowichok" namliq ximiyelik guruppigha tewe ikenliki eskertilgen idi.

engliyening rusiyeni eyiblishi bilen bashlanghan kirizista, engliye 23 rusiye diplomatini, buninggha jawaben rusiyemu engliyening 23 diplomatini chégradin qoghlap chiqarghan idi.