gérmaniyede birleshme hökümet tarqilip kétish girdabigha bérip qaldi

türkiye awazi radiyosi xewiri: gérmaniyede hökümet sépida köchmenler mesilisi toghruluq ixtilap kélip chiqqanliqi sewebidin, birleshme hökümet tarqilip kétish xewpige duch keldi.

wezipisidin istépa bermekchi bolghan ichki ishlar ministiri horst séhofér, bash ministir angéla mérkél bilen axirqi qétim yariship qélishni teklip qilidu.

birleshme hökümettiki xiristiyan démokratchilar partiyesi we xiristiyan ijtimaiy birlik partiyesi arisida köchmenler mesilisi boyiche ixtilap kélip chiqqandin kéyin ichki ishlar ministiri horst séhoférning wezipisidin istépa béridighanliqi küntertipke keldi, biraq ministir horst istépa bérish mesilisini qaytidin közdin kechürüp chiqiridighanliqini bildürdi.

bügün etigende miyunxénda muxbirlarning soallirigha jawab bergen ministir horst, istépa bérish toghrisida chiqqan xewerlerning rastliqini, lékin birleshme hökümettiki ittipaqdashliri bilen yariship qélish üchün yene bir qétim tiriship köridighanliqini éytti.

partiyesining teshkiliy heyet yighinida hem partiyediki hemde hökümettiki wezipisidin istépa bérishni küntertipke élip kélidighanliqini, nawada yariship qélishning mumkinchiliki bolmisa üch yil ichide barliq wezipiliridin istépa béridighanliqini éytqan ministir horst, bu qétimqi körüshüshning netijisige asasen buningdin kéyin qaysi qedemlerni tashlashni qarar qilidighanliqini tekitlep ötti.

xiristiyan démokratchilar partiyesi köchmenler kirizisning hel qilinishi üchün  xiristiyan ijtimaiy birlik partiyesi bilen muzakire ötküzüshke teyyar ikenlikini eskertti.

bash ministir we xiristiyan démokratchilar birlik partiyesi bashliqi angéla mérkél, birleshme hökümettiki ittipaqdéshi xiristiyan ijtimaiy birlik partiyesi bilen köchmenlik we siyasiy panahliq qatarliq mesililerde yüz bergen ixtilaplar toghrisida toghrisida toxtilip: "mesuliyitimni ada qilish üchün birleshme hökümettiki ittipaqdéshimiz bilen birer netijige érishish üchün qolumdin kélishimche tirishimen" dédi.

gérmaniye taratqulirida chiqqan xewerlerde ichki ishlar ministiri horstning köchmenler kirizisi sewebidin ichki ishlar ministirliqi we partiyesining reislik wezipisidin istépa bérishni oylashqanliqini, partiyesining teshkiliy heyet yighinida istépa béridighanliqini küntertipke élip kelgende, partiyesining mejlis guruppa bashliqi aléksandér dobrint we partiyediki nopuzluq shexslerning horsttin bu qararidin waz kéchishni telep qilip turuwatqanliqliri qeyt qilindi.

xiristiyan ijtimaiy birlik partiyesining reislik wezipisini 2008-yildin buyan ötep kéliwatqan horst, bu yil féwralda qurulghan birleshme hökümet sépida ichki ishlar ministirliqi wezipisini üstige alghanidi, biraq bash ministir angéla mérkél bilen horst arisida uzundin buyan köchmenlik we siyasiy panahliq mesililiride ixtilaplar yüz bérip kelmekte.