démistura muzakire diplomatiyesini dawamlashturmaqta
b d t (birleshken döletler teshkilati) süriye alahide wekili stéfan démisturaning süriye üchün özara muzakire diplomatiyesi izchil dawam qilmaqta.
türkiye awazi radiyosi xewiri: démistura amérika, gérmaniye, engliye, firansiye, seudi erebistan we iyordaniyening mesul emeldarliri bilen shiwéytsariye paytexti jenwede süriye mesilisi boyiche körüshti. b d t ning jenwediki ishxanisida axbaratqa yépiq shekilde yighin ötküzüldi. yighinda, b d t xewpsizlik kéngishining 2254-nomurluq qarari ramkisida süriye mesilisini hel qilishqa munasiwetlik jenwediki siyasiy hel qilish musapisi muzakire qilindi.
démistura yighindin kéyin bayanat élan qilip, süriyening nöwettiki weziyiti we özgiriwatqan ehwallar toghrisida özara pikir almashturulghanliqini bildürdi. u mundaq dédi:
"süriyening gherbiy jenubida dawamlishiwatqan herbiy tirkishishlerdin peyda bolghan qayghu-endisheler tilgha élindi we zorawanliqlarni derhal toxtitish chaqiriq qilindi."
u yighinda yene, süriyede siyasiy muressening emelge éshishi üchün xelqaraliq aktiyorlar otturisida ortaq asas yaritish üchün körsitilgen diplomatik tirishchanliqlarning dawamlishishi toghrisida özara pikir almashturulghanliqini bildürdi.
démisturaning yighingha qatnashqan alte döletning siyasiy musape üchün b d t ni qollighanliqidin memnunluq hés qilghanliqini yene bir qétim tilgha alghanliqi eskertildi.
bayanatta, démisturaning asasiy qanun komitéti we siyasiy musapini téximu keng dairede muzakire qilish üchün tereplerni yene bir qétim jenwege teklip qildi.
démistura ötken hepte astana musapining kapalet bergüchi döletliri bolghan türkiye, rusiye we iranning mesulliri bilen jenwede süriyede asasiy qanun komitétining qurulushini muzakire qilish üchün körüshken idi.
