dunya musulman ölimalar birliki ghezze muhasirini bikar qilishqa chaqirdi

türkiye awazi radiyosi xewiri: dunya musulman ölimalar birliki yazma bayanat élan qilip, israiliyening pelestin xelqige qarshi sadir qilghan wehshilerche jinayetlirini eyiblidi we bularning insaniyetke qarshi sadir qilinghan éghir jinayet ikenlikini tekitlep ötti.

bu jinayetlerge süküt qilmasliq kérekliki eskertilgen bayanatta, ghezzege qoshna döletler muhasirini bikar qilishqa؛ shundaqla pütkül musulmanlar pelestin xelqining azablirini yenggillitish üchün xizmet qilishqa؛ diniy zatlar we diniy organlar bolsa, rayondiki ziyunist siyasetlerge qarshi ötüshke chaqirildi.

pelestinlikler, 30 – marttin buyan muhasire astidiki ghezze rayonining israiliye chégrasida «büyük qaytish yürüshi» dégen nam astida tinch usulda namayish ötküzmekte. israiliye eskerliri bolsa, «sürgün qilinghan zéminlirigha qaytishni we 2006 – yilidin buyan ghezzege yürgüzülüwatqan qanunsiz muhasirining bikar qilinishi» ni telep qilghan puqralargha rast oqlarni ishlitip mudaxile qilmaqta.

namayish bashlanghandin buyan balilar we zhurnalistlar qoshulup jemiy 110 din artuq pelestinlik israiliye eskerliri teripidin shéhit qilindi, minglarche pelestinlik yarilanduruldi.

pelestinde 2006 – yili ötküzülüp islamiy qarshiliq körsitish herikiti - hamas ghelibe qilghan saylamlardin kéyin, israiliye hökümiti ghezzeni hawa, quruqluq we déngizdin muhasirige alghan bolup, xelqara jemiyetning naraziliqlirigha qarimay mezkur muhasirini üzlüksiz dawamlashturmaqta.