tusk, donald tramp we rehberlik apparatini nahayiti éghir ibarilerni ishlitip eyiblidi

türkiye awazi radiyosi xewiri: donald tusk sofyada yawropa ittipaqigha eza 28 döletning rehberlirini özara uchrashturidighan gheyriy resmiy kechlik tamaq yighinidin ilgiri taratqulargha bayanat berdi؛ yawropa ittipaqi döletlirining amérika qoshma ishtatlirining yéqinqi mezgillerdiki siyasetlirige qarita «birlik» ini saqlap qélishi kéreklikini tekitligen tusk, «xitayning yüksilishi we rusiyening hujumchi siyasetlirige yéngi bir ehwal qoshuldi, (u bolsimu) amérika qoshma ishtatliri rehberlikining turaqsizliqliri. donald trampning yéqinqi qararlirigha qarilidighan bolsa, eqilge <mushundaq dostlar bolidighanla bolsa, düshmenge kérek yoq> luqi kélidu» dégenlerni qeyt qildi.

yawropa ittipaqigha eza döletler rehberlirining amérika qoshma ishtatlirining soda we iran siyasitini muzakire qilidighanliqini eskertken tusk, «rehberlerning iran bilen tüzülgen kélishimde ching turidighanliqini jezmleshtürüshlirini telep qilimen» dédi.

u, amérikining import qilinidighan polat we alyumingha qoyushni pilanlawatqan qoshumche bajlardin yawropa ittipaqining üzül – késil kechürüm qilinishi kéreklikini éytti.

donald tusk amérika pirézidénti donald trampni eyiblep, «yawropaning uninggha minnetdarliq bildürüsh burchi bar. uning saysiida pütkül aldatquchi xiyallirimiz bilen widalashqan bolduq. yardemge éhtiyajing bolsa, aldi bilen öz – özüngge qilishing kéreklikini chüshinip yettuq. bir tereptin qite halqighan munasiwetlirimizni dawamlashturup, yene bir tereptin öz aldimizgha heriket qilishqa mejbur bolup qalidighanliqimiz toghrisidiki sénariyelerge teyyar bolushimiz kérek. bizge nisbeten bu bir sinaq bolidu, biraq hemme ishtin burun irade we qetiylikke éhtiyajimiz bar» dédi.

rehberlerning, gherbiy balqan döletlirining yawropa ittipaqigha eza bolush mesililirinimu muzakire qilidighanliqini qeyt qilghan donald tusk, bu yerde balqan rayonining iqtisadiy tereqqiyatigha, bu yerdiki xelqlerning bayashatliq we muqimliqigha ehmiyet béridighanliqimizni namayan qilishimiz kérek. chünki, bu yawropa ittipaqining menpeetlirigimu mas kélidu. bulghariyediki yighinimizning nishani buni delillesh bolidu» dégenlerni sözlirige ilawe qildi.