isirailiye süriye chégrasidiki bir jayni bombardiman qildi
isirailiye armiyesi süriyedin étilghanliqi ilgiri sürülgen we ishghal astidiki golan égizlikige chüshken minamiyotqa, oq bilen jawab qayturdi.
türkiye awazi radiyosi xewiri: isirailiye armiyesi ijtimaiy taratquda süriye chégrasidiki minamiyot étilghanliqi ilgiri sürülgen bir jayni bombardiman qilghan toghrisida bayanat élan qildi. bayanatta, süriye zéminidin tuyuqsiz étilghan bir minamiyot oqining golan égizlikidiki bixeterlik simliri bar yerge yéqin bir jaygha chüshkenliki bildürüldi.
bayanatta, isirailiye armiyesining minamiyot oqi étilghan jayni oqqa tutup, jawab qayturghanliqi qeyt qilindi.
minamiyot étishqa beshshar esed hakimiyitining jawabkar ikenliki eskertilgen bayanatta, mundaq déyildi:
«isirailiyening igilik hoquqigha xilapliq qilidighan we puqralarni xeterge ittiridighan her qandaq heriketke ruxset qilinmaydu.»
biraq, bayanatta süriye chégrasidiki minamiyot étilghan u jayning qandaq qoral bilen oqqa tutulghanliqi toghrisida melumat bérilmidi.
9-aprél süriyening humus shehiridiki «T-4» hawa armiye bazisi ikki ayropilan bilen bombardiman qilinghan bolup, bombardimanda iranning ikki eskiri, besh qoralliq adimi ölgen idi. rusiye bilen iran hujum sewebidin isirailiyeni eyibligen idi.
