«büyük qaytish yürüshi» namayishliri tötinchi jümege qedem qoydi
isirailiyening qorshawi astida 12 yildin béri insaniy kirizis ichide yashawatqan pelestinlikler 30-martin buyan bashlighan namayishlirini bügün (20-aprél) mu dawamlashturdi.
türkiye awazi radiyosi xewiri: 2006 -yildin béri isirailiyening qorshawi astida turuwatqan ghezzede insaniy kirizis ichide yashawatqan minglighan pelestinlik 30-marttin tartip dawamlashturuwatqan «büyük qaytish yürüshi» namayishliri daireside bügünmu chégrada toplandi.
ghezze chégrasi bu qétimmu «shéhitler we esirler jümesi» dep nam bérilgen «büyük qaytish yürüshi» ning tötinchi jümesidiki namayishlar ötküzülgen eng muhim jay bolidu.
ghezzediki pelestinlikler isirailiye eskerliri rast oq we muwazinetsiz küch ishletken bolsimu chégradiki tinchliqperwer namayishliridin waz kechmidi. qorshawni emeldin qaldurushni we isirailiye tartiwalghan zéminlargha qaytip kélish hoquqining bérilishini telep qilghan ghezzelikler, etigendin tartip chégragha kélishke bashlidi.
jüme namizidin burun chégrada kishilerning barghanséri köpiyidighanliqi texmin qiliniwatqan bolup, namayishchilar ilgiriki namayishlargha oxshashla jüme namizini chégrada oquydu.
ishghal astidiki iyordan deryasining gherbiy qirghiqidimu ghezze chégrasidiki «büyük qaytish yürüshi» ni qollash üchün jüme namizidin kéyin namayish ötküzüsh pilan qilinmaqta.
yene bir tereptin, isirailiye armiyesi «ghezze xelqige» dégen serlewhe astida ayropilandin tashlighan xitabnamilerde, ghezzeliklerge tehdit saldi. erebche we ingilizche yézilghan xitabnamide, namayishchilar «chégragha yéqinlashmasliq» we «chégra simlirigha ziyan bermeslik» toghrisida agahlanduruldi.
xitabnamide: «armiyemiz hemme ishqa teyyar, her türlük hujumlarning aldini élish üchün hemme ishni qilidu» déyildi.
