amérika afghanistanda yüz bergen qanliq hujum toghrisida hazirghiche ipade bildürmidi

türkiye awazi radiyosi xewiri: washington dairiliri, afghanistan hawa armiyesining 2 – aprélda qunduz wilayitide élip barghan hujumida köp sanliqi balilar bolup 100 ademning ölgenliki toghrisidiki xewerlerge hazirghiche héchqandaq ipade bildürmidi.

amérika qoshma ishtatliri tashqi ishlar ministirliqi, hujumning yüz berginige üch bolghan bolushigha qarimay, anadolu agéntliqining mesilige alaqidar soaligha jawab bérishtin özini qachurdi.

amérika mudapie ministirliqi – péntagon bolsa, anadolu agéntliqigha bayanat bérip, washingtonning hujum bilen héchqandaq alaqisi yoqluqini eskertti.

pursetla tapsa puqralarning ölüp kétish mesililirige «sezgür» qaraydighanliqini bildürüp kéliwatqan amérika tashqi ishlar ministirliqi, weqedin kéyin u heqte soralghan yazma soallargha «soalliringlarni afghanistan hökümitidin soranglar» dep jawab qayturush bilenla boldi qildi.

arqidin ministirliqning ismining ashkarilinishini xalimaydighan bir emeldari anadolu agéntliqigha bayanat bérip, hujumgha alaqidar xewerlerni küzitiwatqanliqlirini eskertken halda, «puqralarning ölüp ketkenliki toghrisidiki xewerlerge estayidil qaraymiz we bigunah kishilerning hayatidin ayrilghanliqidin epsuslanmaqtimiz» dédi.

yene bir tereptin, amérika mudapie ministirliqi – péntagon, amérika eskerlirining afghanistanda yüz bergen mezkur weqe bilen munasiwetlendürülüshige naraziliq bildürdi؛ ministirliq, seyshenbe künidiki yazma bayanatida, «afghanistandiki amérika qoshma ishtatliri eskerliri qunduzda héchqandaq hawa herikiti élip barmidi. buning eksiche qarashlarni ilgiri sürüsh toghra emes» dégenlerni qeyt qilghanidi.

afghanistan hawa armiyesining 2 – aprélda döletning shimaligha jaylashqan qunduz wilayitidiki bir medrisige hawadin hujum qilip, 100 ademning jénigha zamin bolghanliqi, yene nurghun ademni yarilandurghanliqi uqturulghanidi.

qunduz wilayiti dashti archi nahiyesi hakimi nesruddin sedi, ölgenler sanining éship kétishidin endishe qiliwatqanliqlirini bildürgen we hujumning medriside qariyliqni tügetken oqughuchilarni tebriklesh muasimi ötküzülüwatqan esnada yüz bergenlikini uqturghanidi.