pelestin hökümiti amérikida chaqirilghan ghezze yighinini bayqut qildi

türkiye awazi radiyosi xewiri: amérika taratqulirining xewer qilishiche, tünügün aq sarayda chaqirilghan yighingha, israiliye, qatar, seudi erebistan we ereb birleshme xelipiliki qatarliq 19 döletning wekili qatnashqan. emma pelestin hökümiti amérika qoshma ishtatliri pirézidénti donald trampning quddus qararigha naraziliq bildürüp yighinni bayqut qilghan hemde ghezzege alaqidar muzakirilerge qatnashmighan.

trampning küyoghli jaréd kashnéw riyasetchilikide chaqirilghan we kashnérning xelqaraliq muzakiriler ishliri alahide wekili jéysén grinblét hesse qoshqan muzakirilerning muweppeqiyetlik bolup bolmighanliqi heqqide melumat bérilmidi. pelestin hökümitining yighinni bayqut qilishi toghriliqmu aq saray bayanat élan qilmidi.

melumatlargha qarighanda, kashnér ishtirakchi döletlerge ikki saetlik doklat sunghan, arqidin bu heqte muzakiriler élip bérilghan yighingha bezi yawropa döletlirining wekillirimu qatnashqan.

ismini ashkarilashni xalimighan bezi amérika dairiliri  amérika taratqulirigha bergen bayanatlirida, yighinning israiliye bilen ereb elliri otturisida «biwasite söhbet» ni nishan qilidighanliqini bildürgen.

tramp 2017 – yili 6 – dékabir küni élan qilghan bayanatida, quddusni israiliyening paytexti dep étirap qilidighanliqini uqturghan idi.

amérika qoshma ishtatliri tashqi ishlar ministirliqi teripidin ötken ay élan qilinghan bayanatta, tél awiwdiki amérika bash elchixanisining may éyida quddusqa yötkilidighanliqi bildürülüp mundaq déyilgen idi: «may éyida amérika bash elchixanisining quddusta échilishini pilanlawatimiz. bash elchixanining échilishi, israiliye qurulghanliqining 70 – yiligha toghra kélidu.»

pelestin hökümiti amérika qoshma ishtatlirigha qattiq naraziliq bildürgen hemde washingtonning ottura sherq tinchliq musapisidiki muressechilik rolini yoqatqanliqini jakarlighan idi.