2000dek éfiyopiyelik kéniyege qachti

türkiye awazi radiyosi xewiri: éfiyopiyening jenubigha jaylashqan moyalé rayonida yüz bergen zorawanliq weqeliridin kéyin rayondiki minglarche adem kéniyege qachti.

kéniye qizil krést jemiyitining bildürüshiche, chégradin ötken 2000din artuq éfiyopiyelikni qizil krést jemiyiti xadimliri kütüwélip yardem qilghan. köp qismi ayallar we balilardin teshkil tapqan musapirlar 4 lagérgha makanlashqan.

musapirlargha yémek-ichmek, taziliq we sehiye buyumliri yetküzüp bérilgendin sirt, rayonda 12 sehiye xadimi musapirlargha sehiye mulazimiti qilghan.

éfiyopiye armiyesi hepte axiri térrorluq teshkilati oromo azadliq teshkilatigha herbiy heriket élip barghanda xata halda 9 ammining jénigha zamin bolghanliqini uqturghanidi.

éfiyopiyediki jiddiy haletni kontrol qilish üchün qurulghan herbiy qomandanliq merkizi teripidin élan qilinghan bayanatta, weqe üstide élip bérilghan tekshürüsh xizmetliri dairiside 5 herbiy xadimning nazaret astigha élinghanliqi bildürüldi.

éfiyopiye bash ministiri héylémariyam désaléginning ötken ay hem bash ministirliq hemde éfiyopiye xelq inqilabi démokratchilar teshkilati reislik wezipisidin istépa bérishidin kéyin, éfiyopiyede hökümetke qarshi namayishlar qozghilip zorwanliq weqeliri bash kötürüshi sewebidin  memliket miqiyasida jiddiy halet élan qilinghanidi.