amérika shimaliy koréyening memuriy xadimlirini émbargo tizimlikige kirgüzdi
amérika hökümiti shimaliy koréyening yadro qoral sinaqlirida muhim rol oynighanliqi ilgiri sürülgen ikki neper yuqiri derijilik memuriy xadimni émbargo tizimlikige kirgüzdi.
türkiye awazi radiyosi xewiri: amérika maliye ministirliqining chet elliklerning mal-mülkini tekshürüsh ishxanisi shimaliy koréyening yuqiri derijilik ikki memuriy xadimining émbargo tizimlikige kirgüzülgenliki toghrisida bayanat élan qildi. bayanatta, shimaliy koréye herbiy sanaet ministirliqining muawin ministiri kim jongsik bilen shimaliy koréye merkiziy komitétining muawin bashliqi ri piyongcholning émbargo tizimlikige kirgüzülgenliki bildürüldi.
shimaliy koréyening yadro qorallirini tereqqiy qildurush paaliyetliride muhim rol oynighanliqi eskertilgen ikki memuriy xadimning, b d t xewpsizlik kéngishi teripidin 22-dékabir élan qilinghan émbargo tizimlikide barliqi qeyt qilindi.
amérika pirézidénti donald tramp 20-noyabir shimaliy koréyeni «térrorluqni qollighan dölet» dégen idi.
maliye ministirliqining chet elliklerning mal-mülkini tekshürüsh ishxanisi trampning bu bayanatidin kéyin, 21-noyabir shimaliy koréyening sodisini cheklesh üchün bir shexs, 13 shirket we 20 paraxotni qara tizimlikke kirgüzgen idi.
shimaliy koréye amérikaning «térrorluqni qollighan döletler» tizimlikide, iran, sudan we süriyedin qalsila tötinchi rette turidu. qara tizimlikke ikkinchi qétim kirgüzülgen shimaliy koréye, 2008-yili jorj bush chiqiriwétishtin burun 20 yil tizimlikte qalghan idi.
