lawrow: amérika bilen rusiye arisida tömür perde yoq

türkiye awazi radiyosi xewiri: sérgéy lawrow, ria nowosti xewer agéntliqining soallirigha jawab bérip, 1945 – yilidin soghuq urush axirlashqan 1991 – yilighiche yawropani ikkige ayrip turghan idéologiyelik toqunush sahelirini we maddiy chégralarni körsitip béridighan tömür perde atalghusini bügünki rusiye – amérika munasiwetliri üchün ishletkili bolmaydighanliqini eskertti.

u, washington tashlighan bezi qedemler tüpeyli ikki terep munasiwetliride yaxshilinish bolmighanliqi tilgha aldi we buninggha rusiyening amérikidiki diplomatik mal – mülüklirining musadire qilinishi, rus diplomatlar we rusiye médiya organlirigha ishlitilgen bésimlarni misal qilip körsetti.

sérgéy lawrow, nöwettiki ehwalda ikki terep munasiwetliride oyghinish we yaxshilinish bolidu, dep oylaydighanliqinimu qeyt qildi. moskwaning zitlishish terepdari emeslikini, biraq washington terepning bildüridighan herqandaq bir hujumchi pozitsiyesige jawab qayturulidighanliqini eskertken lawrow, «shériklirimizni özara diyalog ornitish kérekliki pirinsiplirigha chaqirip, pozitsiyemizni saqlap qalimiz. washingtondiki asasliq mesile özara menpeetlerni közde tutush. bu bolmay turup munasiwetlerni tüzitish we xelqaraliq mesililerde paal hemkarliq ornitish mumkin emes» dégen ibarilerni ishletti.

lawrow amérika qoshma ishtatliridiki rusiye wehimisining nahayiti yuqiri baldaqlargha örligenlikini bildürdi we «bu ehwal döletlirimiz üchün muhim bolghan sahelerde ilgirilesh hasil qilishimizgha tosqunluq peyda qilmaqta, xelqara sehnide téximu köp sürkilish peyda qilmaqta» dédi.

rusiye pirézidénti wiladimir putin bilen amérika pirézidénti donald trampning aldimizdiki künlerde uchrishish pilanining yoqluqini eskertken lawrow, ikki rehberning asiya tinch okyan iqtisadiy hemkarliq teshkilati bashliqlar yighinida yüzturane körüshkenlikini, arqidin 21- noyabir, 14 – dékabir we 17 – dékabirda téléfonda körüshkenlikini eslitip ötti.

sérgéy lawrow shimaliy koréye mesilisi toghrisida toxtilip, «rusiye, ne piyongyangning bir yadro küchi bolush istikige ijabiy qarimaydu, ne bu istekke yol qoymaydu. emma, shimaliy koréyege bésim ishlitish we uni muhasirige élish teshebbuslirimu xewplik. piyongyangni jazalash üchün qizil siziqlarni sizishning ornigha koréye yérim arilini yadro qoralliridin xaliylashturush üchün sijil qedemlerning tashlinishi terepdarimiz. shimaliy koréyege muhasirige élishtek bir pilanning ijra qilinishi insaniy kirizis peyda qilidu» dégenlerni sözlirige ilawe qildi.