jenwede süriye muzakiriliri qayta bashlandi

türkiye awazi radiyosi xewiri: shiwéytsariyening jenwe shehiride 28 – noyabir küni bashlanghan muzakirilerning ikkinchi qismida birleshken döletler teshkilatining süriye alahide wekili staffan dé mistura öktichiler bilen körüshti.

melumatlargha qarighanda, jüme küni muzakiriler toxtitip qoyulghandin kéyin demeshqqe qaytqan beshshar esed hakimiyiti heyitining jenwege qachan qaytidighanliqi melum emes iken.

süriyelik öktichilerdin teshkil tapqan muzakire aliy komitétining bashliqi nasir heriri mistura bilen élip barghan uchrishishlirida, süriyede beshshar esed hakimiyiti salghan zulum – sitemlerning tepsilatliri we urush jinayetiliri sadir qilghanlarning sotqa tartilishi toghruluq teklip sunghanliqlirini eskertti.

özlirining süriye kirizisini siyasiy yollar arqiliq hel qilish charisi tépish yolida körsitiwatqan tirishchanliqlirini qoyuq halette dawamlashturidighanliqlirini qeyt qilghan heriri, beshshar esed hakimiyiti bolsa türlük bahane – seweblerni körsitiwatqanliqini tekitlesh bilen bir waqitta, beshshar esed hakimiyiti heyitining jenwe muzakirilirige qatnashmighanliqini eskertken halda mundaq dédi: «biz bu yerde 1 – jenwe bayannamisi we birleshken döletler teshkilati xewpsizlik kéngishining 2254 – nomurluq qararinining ishqa ashurulushi üchün muzakire élip bériwatimiz. bu qararlarni biz chiqarmighan. sizgimu melum bolghinidek, muzakiriler öktichiler bilen beshshar esed hakimiyiti otturisida élip bériliwatidu. biz jenwege birla heyet we birla meqset üchün kelduq. nöwette qaysi terepning muzakirilerni ret qiliwatqanliqini jakarlash xelqara jemiyetning, birleshken döletler teshkilatining we b d t alahide wekilining mesuliytidur.»