ispaniye «musteqilliq référandumi» din kéyin kataloniyege émbargo yürgüzüshke bashlidi

türkiye awazi radiyosi xewiri: ispaniye iqtisad ishliri ministiri luis dé guindos ministirlar kéngishidin kéyin muxbirlarning soallirigha jawab bergende, mundaq dédi: «herqaysi shirketler merkiziy binalirini kataloniye sirtidiki bashqa sheherlerge yötkimekchi bolsa, bu basquchni tézleshtürüsh üchün qanuniy küchke ige qararname chiqirimiz. soda dunyasida muqimsizliq we endishe peyda qiliwatqan mesuliyetsiz siyaset sewebidin köp sandiki muhim shirketler merkez binalirini kataloniyedin bashqa jaylargha yötkimekte. buningdin tolimu epsuslinimiz. hökümet bolush süpitimiz bilen hemishe kataloniyediki shirketlerni qollaymiz hem bu heqte muhim tedbirlerni alimiz. sabadél bankisi yaki biyotéxnik shirkiti orizongha oxshighan shirketler özliri xalap merkez binalirini barsélonaning sirtigha yötkidi.»

yene bir tereptin, musteqilliq terepdarlirining paaliyetliridin biaram bolghan kayka bankisi, gas natural we fréykénét shirketlirimu merkez bankilirini barsélonaning sirtigha yötkesh üchün heriketke ötti.

hökümet bayanatchisi inigo méndéz dé wigo kataloniye yerlik hökümitining musteqilliq paaliyetlirining aldini élish üchün del waqtida muhim qararlarni chiqiridighanliqlirini eskertish bilen bir waqitta, kataloniye aptonom rayonluq hökümitini musteqilliq paaliyetlirini toxtitishqa chaqirdi, shundaq qilghan teqdirde, söhbet ötküzüsh éhtimalliqining barliqini qeyt qildi.

bu ariliqta, xelqara pul fondi teshkilati kataloniyediki musteqilliq heriketlirining ispaniye iqtisadi üchün muqimsizliqni keltürüp chiqirish éhtimalliqining barliqini agahlandurdi.

xelqara pul fondi teshkilatining washingtondiki merkez binasida ispaniyening iqtisadiy ehwali heqqide yilliq doklat sunghan teshkilatning ispaniye shöbisining mesuli andra schasér: «kataloniyediki muqimsizliq we sürkilish uzirap ketken teqdirde, meblegh salghuchilarning qararliri we inshenchilirige selbiy tesir körsitishi mumkin» dédi.