8-qétimliq süriye uchrishishliri bir ay ichide bashlinidu

türkiye awazi radiyosi xewiri: b d t süriye alahide wekili démistura b d t xewpsizlik kéngishige eza döletlerge süriyening nöwettiki weziyiti heqqide melumat berdi. u qazaqistan paytexti astanada bashlanghan uchrishishlar netijiside, süriyede töt «toqunushmasliq rayoni» qurulghanliqini, biraq dölet ichide dawamlishiwatqan toqunushlar sewebidin weziyetning yenila jiddiy ikenlikini bildürdi.

u toqunushmasliq rayonlirining süriyening parchilinishigha seweb bolmasliq, döletning bir pütünlüki we zémin pütünlükining qoghdilishi toghrisidiki pikir birlikining omumiy jehettin üstün orunda ikenlikini eskertti. u mundaq dédi:

«jenwede 8-qétimliq süriye uchrishishlirini bir ay ichide, yeni öktebir éyining axiri yaki noyabir éyinng béshida bashlashni pilan qiliwatimen.»

démistura beshshar esed hakimiyitige we öktichilerge uchrishishlargha «shertsiz» qatnishishni chaqiriq qilip, «beshshar esed hakimiyitining öktichiler bilen semimiy muzakire qilish mesuliyitining barliqini, öktichilerning uchrishishlargha ortaq munberde bir awaz bolup qatnishish mesuliyitining barliqini» tekitlidi.

amérikaning b d t diki daimiy wekili süriyede mesilini uzun muddetlik hel qilishning birdinbir yolining siyasiy yol ikenlikini we buning bilen mumkin bolidighanliqini, biraq bu ehwalning irangha, beshshar esed hakimiyitige yaki daéshqa purset yaritip bermesliki kéreklikini eskertti.