inérpolning 173 daésh adem bomba hujumchisining tizimlikini tarqatqanliqi ilgiri sürüldi
xelqara saqchi teshkilati (intérpol), yawropa saqchi teshkilatlirigha daéshning adem bomba hujumchisi bolush éhtimali bar alte yawropaliqni öz ichige alghan 173 kishining ismini yollidi.
türkiye awazi radiyosi xewiri: gérmaniyede chiqidighan «Die Welt» géziti, intérpolning may éyida ewetken mezkur tizimlikidiki 132 kishining iraq, shimaliy afriqa, pars qoltuqi elliri, tajikistan we bangladish puqraliri ikenlikini yazdi. tizimliktiki yawropaliq 6 kishining bolsa, gérmaniye, bélgiye, firansiye, gollandiye we bosniye – gértségowinadin ketkenliki qeyt qilindi.
xewerde, gérmaniyediki daéshqa chétishliq kishining shimaliy rén wéstfalya ölkisining solingén shehiridin 27 yashliq bir gérmaniye puqrasi ikenliki, mezkur kishining 2012 – yilining küz aylirida aldi bilen misirgha, u yerdin türkiyege, arqidin süriyege barghanliqi, daéshning iyul éyining otturisida ijtimaiy taratqu arqiliq bayanat bérip, bu kishining raqqede ölgenlikini élan qilghanliqi qeyt qilindi.
xewerde yene, gérmaniye saqchi tarmaqlirining gézitning bu heqtiki soallirigha jawab bermigenliki toghrisidiki uchurlarghimu orun bérildi.
intérpolning tizimlikidiki isimlarning iraqning musul shehiridiki daéshqa qarshi herbiy heriketler esnasida qolgha chüshürülgenliki ilgiri sürüldi.
«Die Welt» gézitining xewirige qarighanda, amérika dölet bixeterlik tarmaqliri bu tizimlikni tekshürüp, intérpolgha yollighan, intérpol bolsa, tizimlikni may éyida yawropadiki saqchi organlirigha ewetken.
«Die Welt» géziti, gérmaniye xewpsizlik küchlirini menbe qilip turup bergen xewiride, daéshning bu tizimliktiki bir qisim kishilerni adem bomba hujumi sadir qilish üchün, yawropagha yollashqa urunush éhtimalining barliqini eskertti.
