qatar bilen diplomatik munasiwitini üzgen dölet sani 9 gha yetti

türkiye awazi radiyosi xewiri: qatar bilen diplomatik munasiwetlirini üzgen döletler sépige komoromu qoshuldi.

afriqa qitesige qarashliq aral döliti komoro, seudi erebistan bilen behreyn teripidin térrorchilarni maliye bilen teminlesh bilen eyiblengen qatar bilen diplomatik munasiwetlirini üzdi.

seudi erebistan xewer agéntliqi, komoroning paytexti moronidiki qatar elchixanisigha diplomatik munasiwetlerning üzülgenlikining uqturulghanliqini xewer qildi.

buning bilen komoro qatar bilen diplomatik munasiwetni üzgen toqquzinchi dölet boldi.

sénégalmu qatardiki bash elchisini qayturup kétishni qarar qildi؛ sénégal tashqi ishlar ministirliqi yazma bayanat élan qilip, döletning dohada turushluq bash elchisining döletke chaqirilghanliqini eskertti.

bir türküm ellerning qatar bilen diplomatik munasiwetlirige xatime bérishidin kéyin, pars qoltuqidiki özgirishlerni yéqindin teqib qiliniwatqanliqigha isharet qilinghan bayanatta, sénégalning seudi erebistan, ereb birleshme xelipiliki, behreyn we misir bilen hemkarliq ichide ikenliki qeyt qilindi.

qatar bilen diplomatik munasiwetni üzgen eller qatarigha buningdin ilgiri mawritaniyemu qétilghanidi.

mawritaniye resmiy xewer agéntliqi – a.m.i, qatar mewjut siyasetlirini dawamlashturushta ching turghanliqi üchün, mawritaniyening diplomatik munasiwetlerni toxtatqanliqini xewer qilghanidi.

mawritaniye tashqi ishlar ministirliqi bayanat bérip, mawritaniye islam jumhuriyitining ereb menpeetlirini qoghdash jehette herdaim küchlük pozitsiye bildürüp kéliwatqanliqini tekitligen we qatarning ereblerning ortaq pirinsiplirigha qarshi chiqqanliqini؛ ereb elliride qalaymiqanchiliq we xatirjemsizlik yaritishqa urunghanliqini shundaqla insaniy kirizislerning bash kötürüshige seweb bolghanliqini ilgiri sürgenidi.

seudi erebistan, misir, behreyn, ereb birleshme xelipiliki, yemen, liwiye we moldawiye aldinqi küni qatar bilen bolghan pütkül diplomatik munasiwetlirini toxtatqan shundaqla qatargha qarita déngiz we hawa chégralirini taqiwetkenidi.

qatarliq diplomatlarning döletlerdin chiqip kétishi üchün 48 saet؛ qatar puqraliri üchün 14 kün möhlet bérilgen, qatarning seudi erebistan bashchiliqidiki husiylargha qarshi yemende teshkilligen xelqara birleshmidiki roligha xatime bérilgenliki bildürülgenidi.

bu jeryanda iyordaniye, qatar bilen diplomatik munasiwetlirining derijisini töwenlitish we eljezire qanilining dölet tewelikidiki ishxanilirini taqiwétishni qarar qilghanidi.

marakesh xan jemeti awiyatsiye shirkitimu qatar bilen diplomatik munasiwetlirini üzgen döletlerge doha arqiliq baridighan ayropilan seperlirini toxtatqanliqini bildürgenidi.