girétsiye paytextige musulmanlar qebristanliqi berpa qilish telep qilindi

türkiye awazi radiyosi xewiri: syrizaning gümüljine parlamént ezasi mustafa mustafa we iskeche parlamént ezasi hüseyin zeybek qatarliqlarni öz ichige alghan parlamént ezaliri, munasiwetlik ministirliqlarning jawab bérishini telep qilip parlaméntqa teqdim qilghan teklip layiheside, atinadiki musulmanlar nopusini nezerde tutup, bir musulmanlar qebristanliqi tesis qilishning éhtiyajgha aylanghanliqi, buningdin bashqa aténaning musulmanlar qebristanliqi yoq birdinbir yawropa döliti paytexti ikenliki, musulmanlarning méyitlirini depne qilish üchün éghir chiqim tartip döletlirige yaki yüzlerche kilométir yiraqliqtiki musulman türk az sanliqlar yashawatqan gherbiy trakyagha ewetiliwatqanliqi alahide tekitlendi.

musapirlar ölüp ketken teqdirde mesilining téximu murekkepliship kétiwatqanliqini eskertken syriza parlamént ezaliri, aténada musulmanlarning éhtiyajlirini qamdash üchün qebristanliq tesis qilish yaki mewjut qebristanliqlardin musulmanlargha xas jay ajritip bérilishi üchün, hökümetning qanuniy belgilime chiqirip – chiqarmaydighanliqini sordi.

mezkur teklip layihesini teqdim qilghan parlamént ezaliri yene, alaqidar ministirliqlarning melum mezgil ilgiri aténada musulmanlar qebristanliqi berpa qilish üchün san sinod teripidin ajritip bérilgen 20 ming kiwadrat métir jayning we selanikning éwosmo rayonidiki musulmanlar qebristanliqi qurulushining némishqa ilgirilimeywatqanliqi toghrisida parlaméntqa izahat bérishini telep qildi.

girétsiye chérkawining eng yuqiri hoquqluq qarar chiqirish orgini hésablinidighan san sinod, hökümetning telipige asasen ötken yili paytext aténadiki özige tewe bir jaydin musulmanlar qebristanliqi üchün 20 ming kiwadrat métir jayni ajritip bérishini qarar qilghanidi.

girétsiye dairiliri bayanat bérip, selanikning éwosmo rayonidimu musulmanlar qebristanliqi qurush xizmetlirining bashlighanliqini uqturghanidi.