hékmetyar hökümet bilen tinchliq kélishimi tüzüshining sewebige izahat berdi

türkiye awazi radiyosi xewiri: afghanistanda ötken yili hökümet bilen tinchliq kélishimi imzalighan qoralliq öktichi guruppilardin silam partiyesi rehbiri gulbeddin hékmetyar aridin uzun yillar ötkendin kéyin qollighuchiliri bilen bir yerge jem boldi.

döletning sherqiy qismigha jaylashqan laghman wilayitining merkiziy mehtarlam shehiride xelqqe xitab qilghan hékmetyar, afghanistanning küchlük bir merkiziy hökümetke éhtiyaji barliqini, merkiziy hökümetning küchiyishi üchün, özining héchqandaq hoquq – mensep kütmestin estayidil xizmet qilidighanliqini, döletning pütkül afghanlarning öyi ikenlikini eskertti.

u, afghanistanda ilgiri yüz bergen selbiy riqabetler keltürüp chiqarghan nachar aqiwetlerni xatiriletken halda, buningdin kéyin bundaq selbiy ehwallardin yiraq turush kéreklikini tilgha élip ötti.

afghanistandiki térrorluq guruppilirini qoral tashlashqa chaqirghan hékmetyar, talibanning hökümetke qarshi urush qilishining toghra emeslikini qeyt qildi.

buningdin kéyin afghanistanda bir tamchimu qanning tökülüshini xalimaydighanliqini, afghanistan xelqining buni kötürgüdek majalining qalmighanliqini tekitligen hékmetyar, «emdi urushni we héchkimning yétim bolup qélishini xalimaymiz» dédi.

20 yilgha yéqin waqittin kéyin afghanistan xelqige xitab qilghan hékmetyar, partiyesining zörür, dep qarighan bir mezgilde qoralliq küreshke ishtirak qilghanliqini, biraq, nöwette bu küreshni döletke paydiliq, dep qarimighanliqi üchün, tinchliq ornatqanliqlirini eskertti. u, afghanistan hökümitige chaqirip qilip, kélishimning ijra qilinishini we partiyesining qamaqtiki ezalirining qoyup bérilishini telep qildi.

afghanistan pirézidénti eshref ghéni bilen islam partiyesi rehbiri hékmetyar ötken yili tinchliq kélishimi imzalighan bolup, kélishim gulbeddin hékmetyar we partiye ezalirining isimlirining xelqara qara tizimliktin chiqirilishi, kabulda bixeter hayat kechürelishi üchün, ayrim bir herbiy rayon tesis qilinishi, döletning imkaniyetliridin behrimen bolushining kapaletke ige qilinishi we qamaqtiki partiye ezalirining qoyup bérilishi qatarliq nuqtilarni mezmun qilidu.

islam partiyesi 14 yildin buyan afghanistan hökümitige qarshi jeng qilip kéliwatqan bolup, köp qétim kabulni öz ichige alghan oxshash bolmighan sheherlerde xewpsizlik küchliri we chet elliklerge qarshi hujumlarni sadir qilghanidi.