birleshken döletler teshkilati süriyede doxturxanilargha qilinghan hujumlarni eyiblidi
birleshken döletler teshkilati süriyening shimalidiki doxturxanilargha qilinghan hawa hujumlirida puqralarning ölüp ketkenlikini bildürdi hemde bundaq wehshiylikke derhal xatime bérilishini telep qildi.
türkiye awazi radiyosi xewiri: birleshken döletler teshkilati insaniy ishlar maslashturghuchiliri teripidin élan qilinghan qoshma bayatta, süriyening shimalidiki doxturxanilar we bashqa shipaxanilarning hawa hujumlirigha uchrishi seweblik yüz minglarche kishining sehiye xizmetliridin mehrum boluwatqanliqi tekitlinip mundaq déyildi: «birleshken döletler teshkilati ammigha xizmet qilidighan doxturxana we shipaxanilarning ziyangha uchrishi we weyran qilinishidin tolimu epsuslinidu. mushu ay ichidila 4 doxturxana hujumgha uchridi, jümlidin 25 – aprél küni idlibning kefer teharim nahiyesidiki shéhit wasim hüseyni doxturxanisi hawa hujumigha uchrap, pütünley xarab boldi, 22 – aprél küni idlibning abdin rayonidiki yer asti doxturxanisi hawa hujumigha uchrap, 4 puqra qaza qildi, yene shu rayonda mushu ay ichide 4 shipaxana hawa hujumliri netijiside éghir ziyangha uchridi. doxturxanilar we insanlarni qutquzush yolida pidakarliq körsitiwatqan doxturlarning bombilinishini qetiy qobul qilishqa bolmaydu, üzlüksiz dawamlishiwatqan hujumlar netijiside yüz minglarche kishi sehiye xizmetliridin mehrum qaldi, bu insanlarni yashash hoquqidin mehrum qilish hésablinidu, shunga bundaq wehshiylikke derhal xatime bérilishi shert.»
