aqsaray bayanatchisi «gétlir» toghrisidiki sözlirige arqa - arqidin izahat berdi
amérika aqsaray bayanatchisi séan spisér, beshshar esed hakimiyet béshidila bolidiken, tinchliq höküm süridighan bir süriyeni wujudqa chiqirishning mumkin emeslikini éytti.
türkiye awazi radiyosi xewiri: aqsaray bayanatchisi séan spisér kündilik muxbirlarni kütüwélish yighinida, öz xelqige qarshi ximiyelik qoral ishletken bir hakimiyetning dölitide tinchliq ornitishining mumkin bolmaydighanliqini tekitlidi؛ u, amérika qoshma ishtatlirining ikkinchi dunya urushi mezgilidimu ximiyelik qoral ishletmigenlikini bildürgen halda, «gétlirmu ximiyelik qoral ishletküdek derijide peskeshliship ketmigenidi» dédi, biraq arqidinla sözlirige tüzitish kirgüzüsh zörüriyiti hés qilip, meqsitining «gétlirning esedke oxshash usullar bilen öz xelqige sarin gazi ishletmigenliki» ni ipadilesh ikenlikini eskertti.
séan spisér arqidin yazma bayanat élan qilip, sözlirining «yehudiy qirghinchiliqi» bilen sélishturulmasliqi kéreklikini tekitlidi؛ gherizining esed bilen gétlirni sélishturush emeslikini eskertken spisér, yehudiy qirghinchiliqi yaki gétlirni eslitidighan sözlirining xata bolghanliqini we ammidin kechürüm soraydighanliqini bildürdi.
esed hakimiyitini her jehettin qollawatqan rusiyeni bolsa, «tarixiy xata terep» te turush bilen eyibligen spisér, «rusiye, shimaliy koréye, süriye we iran bilen yanmuyan turmaqta we rusiyedin bashqilar meghlup döletlerdur. bu ehwalda rusiyening özini (xelqara jemiyet) yalghuzlashturghanliqida shübhe yoq» dédi.
spisér, nöwettiki ehwalda esed hakimiyitining ximiyelik qorallargha ige bolmasliqi kéreklikini we alaqidar kélishimge rusiyeningmu qol qoyghanliqini xatiriletken halda, moskwaning demeshq üstidiki nopuzini ximiyelik qorallarni ishletmeslikni kapaletke ige qilish üchün ishlitishi kéreklikini éytti.
amérikining ottura sherqtiki aldinqi pilandiki ishining hélihem daéshni yéngish ikenlikini tekitligen aqsaray bayanatchisi séan spisér, «ikkinchi bolup, eger rusiye we bashqilirining küch chiqirishi sayisida siyasiy muhit yaritilsa, süriyelikler özlirige bir lidir sayliyalaydu» dédi.
spisér yene, rusiyening idlibtiki ximiyelik qoral hujumidin xewerdar yaki emeslikige toghrisida amérika dölet bixeterlik tarmaqliri arisida birdeklik yoqluqini qeyt qildi.
