«amérikining bashqurulidighan bomba hujumi süriye hökümitige bérilgen muhim agahlandurush»
türkiye amérikining süriyening hawa armiyesi bazisigha bashqurulidighan bombilar arqiliq hujum qilishining demeshq hökümitige bérilgen jiddiy agahlandurush ikenlikini bildürdi.
türkiye awazi radiyosi xewiri: jumhur reislik sariyi bayanatchisi ibrahim qalin amérikining bügün etigen süriyening humus shehiridiki sheyrat hawa armiyesi bazisigha qilghan hawa hujumining beshshar esed hökümiti sadir qiliwatqan urush jinayetlirige bérilgen ijabiy jawab ikenlikini éytti.
muawin bash ministir numan qurtulmush amérikining mezkur herbiy bazigha hujum qilishining süriye kirizisini hel qilish yolida tashlanghan ijabiy we ehmiyetlik qedem ikenlikini eskertti hemde bu herbiy heriketning tinchliqning ishqa ashurulushida türtklik rol oynishigha tilekdashliq bildürüp mundaq dédi: «beshshar esed hakimiyitini öz xelqige ziyan yetküzelmeydighan ehwalgha chüshürüp qoyush üchün birleshken döletler teshkilati süriye hökümitige türlük émbargolarni yürgüzüshi lazim.»
tashqi ishlar ministiri mewlüt chawushoghlu bu heqte toxtalghanda, «amérikining bu herikitini toghra dep qaraymiz hem qollaymiz. süriyening ichide bixeter rayonlarni berpa qilish bashqa waqittikige qarighanda hazir téximu muhim bolup qaldi. shunga bixeter rayonlarning dairisini téximu kéngeytish lazim» dédi.
tashqi ishlar ministirliqi teripidin bu heqte élan qilinghan bayanattimu, süriye hökümitining xan sheyxundiki ximiyelik qoral hujumidin kéyin amérikining süriyege hujum qilishining nahayti toghra ish ikenliki tekitlinip mundaq déyildi: «süriye hökümitining bu qétimqi we bashqa jinayi qilmishlirining jazasiz qalmasliqi we buningdin hésab élish toghruluq tashlinidighan qedemlerni türkiye qizghin qollaydu.»
yawropa ittipaqi ishliri ministiri ömer chelik amérikining herbiy herikitining süriye hökümitige bérilgen jiddiy agahlandurush ikenlikini, shunga bashqa döletlerning bu heriketni eyibleshke oxshighan pozitsiyelirini qobul qilghili bolmaydighanliqini tekitlep, «beshshar esed hakimiyitining hazirghiche dawamlashturuwatqan qetliamlirigha köz yumuldi, süriye kirizisining hazirqidek mureklepliship kétishimu del bu heqte chiqirilghan xata qararlarning netijisi» dédi.
