b d t: muhasire astidiki puqralarning ehwali künséri éghirlashmaqta
birleshken döletler teshkilati (b d t), süriyening raqqe we sherqiy ghute rayonidiki 800 ming puqraning aqiwitidin endishe qiliwatqanliqini bildürdi.
türkiye awazi radiyosi xewiri: b d t xewpsizlik kéngishi, süriyediki insaniy weziyet we yardem xizmetliri toghrisida chaqirdi؛ yighinning metbuatqa ochuq qismida söz qilghan b d t ning insaniy mesililerge mesul muawin bash katipi we jiddiy ehwallar kordinatori stéfén obrién, «süriye kirizisi 7 – yiligha qedem qoydi we biz insanning qoli arqiliq meydangha kelgen eng éghir insaniy kirizisqa guwah boluwatimiz» dédi.
süriyediki pütkül tereplerning urush jinayiti we insanliqqa qarshi jinayet sadir qilghanliqini bildürgen obrién, toqunush we herbiy heriketler dawamlishiwatqan rayonlardiki puqralarning hayati bixeterlikini muhapizet qilishqa chaqirdi.
raqqediki herbiy heriket we toqunushlarda puqralarning hayatidin ayriliwatqan, yariliniwatqanliqi toghrisida uchurlarning kéliwatqanliqini tilgha alghan obrién, «raqqe wilayitide dawamlishiwatqan herbiy heriketler yüzisidin 400 mingdin artuq puqraning hayati bixeterlikidin küchlük endishe qiliwatimen» dégenlerni sözlirige ilawe qildi.
toqunushlarning raqqening merkizige yéqinlishishining bu endishilerni téximu kücheytiwetkenlikini qeyt qilghan obrién, pütkül tereplerdin xelqara qanunda körsitilgen belgilimilerge riaye qilishni telep qilidighanliqlirini eskertti.
stéfén obrién, süriyening muhasire astidiki sheherliride insaniy weziyetning barghanche nacharliship bériwatqanliqini qeyt qildi we «bolupmu 400 minggha yéqin puqra hökümet küchlirining muhasirisi astida turuwatqan sherqiy ghutediki xewpsizlik we insaniy mesililerdin küchlük endishe qiliwatimen» dep körsetti.
sherqiy ghute we demeshq taghliq rayonidiki toqunushlar yüzisidin minglarche kishining öy – makanliridin ayrilip qalghanliqinimu tilgha alghan obrién, sherqiy ghutediki 3 dane dölet igilikidiki doxturxana bilen 17 sehiye merkizining hujumlar netijiside paydilanghili bolmaydighan halgha kélip qalghanliqini eskertti.
obrién, muhasire astidiki medaya, zebedani, fua we kefreyadin ibaret töt bazardiki puqralarning tarqaqlashturulushi boyiche hasil qilinghan kélishim toghrisidimu toxtilip, tereplerning 9 ay boyiche özara toqunushmasliq we puqralarning tarqaqlashturulushi bilen insaniy yardemlerning kélishige ruxset qilishni mezmun qilghan kélishimini közitiwatqanliqini sözlirige ilawe qildi.
مۇناسىۋەتلىك خەۋەرلەر
nigériyede bir jamede partlash yüz bérip 11 adem qaza qildi
nigériyening kano ölkisidiki bir jamede yüz bergen partlashta 11 adem hayatidin ayrildi.
