gérmaniyening arqisidin gollandiyemu térrorchilargha yantayaq boldi

türkiye awazi radiyosi xewiri: PKK térrorluq teshkilati terepdarliri, gollandiyening ruxset qilishi sayisida lahey shehiride bash térrorchining süretliri, teshkilatqa simwolluq qilidighan parche latilarni kötürüshken halda paaliyet ötküzdi. newruz bayrimini tebriklesh dégen nam astida ötküzülgen paaliyetke 200 etrapida adem ishtirak qildi.

teshkilat terepdarliri térrorluq teshkilatini qollap, türkiyege qarshi shoarlarni towlidi.

gollandiyening yawropa ittipaqining térrorluq teshkilatliri tizimlikide ismi bolushigha qarimay PKK gha ruxset qilishigha qosh ölchem, dep baha bérilmekte.

PKK ning paaliyet ötküzüshige ruxset qilghan gollandiye, türk ministirlarning paaliyet ötküzüshige yol qoymighanidi. 11 – martta tashqi ishlar ministiri mewlut chawushoghluning ayropilanining qonush ruxsiti emeldin qaldurulghan, aile we ijtimaiy siyasetler ministiri fatma betül sayan qayamu irqchi we fashistlarche muamile bilen chégradin qoghlap chiqirilghanidi.

gollandiye hökümiti bu qilmishlirigha bixeterlik we jemiyet tertipini bahane qilip körsetkenidi.

PKK terepdarliri bélgiyening paytexti biryusséldiki yawropa ittipaqi organlirigha yéqin jaydimu noruz nami astida paaliyet ötküzüp, 16 – apréldiki omumiy xelq bélet tashlash paaliyitide jumhur reislik hökümet tüzüminimu öz ichige alghan asasiy qanungha özgertish kirgüzüshke qarshi bélet tashlash teshwiqati élip bardi.

bölgünchi térrorluq teshkilati ötken hepte axiridimu türk ministirlarning yighin ötküzüshige ruxset qilmighan ikkinchi bir dölet gérmaniyede namayish ötküzgenidi.

gérmaniyening bölgünchi térrorluq teshkilatining paaliyetlirige ruxset qilishi türkiyening qattiq naraziliqini qozghighanidi.