giwatémaladiki ot apitide 25 qiz oqughuchi köyüp ketti
ottura amérika döliti giwaatémalaning paytexti giwatémala sitigha yéqin jaydiki bir yataq binasida éghir ot apiti yüz berdi.
türkiye awazi radiyosi xewiri: ottura amérika döliti giwaatémalaning paytexti giwatémala sitigha yéqin jaydiki bir yataq binasida ot apiti yüz bérip, 14 yash bilen 17 yash arisidiki 25 qiz oqughuchi hayatidin ayrildi, yene 25 kishi yarilandi.
ot apitidin xewer tapqan yashlar we oqughuchilarning aile – tawabiatliri endishe ichide weqe yüz bergen jaygha seldek aqti.
oqughuchilar yatiqidiki qizlar jinsiy dexli – teruzgha uchrighanliqini eskertip seyshenbe küni isyan kötürgendin kéyin, saqchilar weqege mudaxile qilghan, u jeryanda 60 qa yéqin bala qéchip ketkenidi.
saqchilar, deslepki tekshürüshke asasen, ot apitining bir guruppa yashning yataq binasigha qoyup bérishi netijiside meydangha kelgenlikini uqturdi.
mezkur jayda asasliqi 18 yashtin töwen ziyankeshlikke uchrighuchilar, öy – makansiz qalghanlar yaki terbiyelesh ornidiki turush mudditi axirlashmighan balilar we yashlar yétip qopatti. normal sharaitta 60 kishilik pilanlinip sélinghan mezkur binada, ot apiti yüz bergen esnada 800 kishining barliqi texmin qilinmaqta.
pajiedin kéyin dölet miqyasida üch künlük matem élan qilindi. giwatémalaning qanun chiqirish orgini bolghan jumhuriyet qurultiyi bolsa, ot apitining derhal tekshürülüshini telep qildi. bir qisim hökümet emeldarlirimu xélidin buyan mezkur binaning sharaitining nacharliqini otturigha qoyup kelmekte idi.
