haway ishtati trampning permanigha qarshi sotqa erz sunidu
amérikining haway ishtati pirézidént donald trampning alte musulman dölet puqralirigha wiza cheklimisi qoyghanliqi üstidin fédératsiye sotigha erz qilidu.
türkiye awazi radiyosi xewiri: haway ishtatidiki adwokatlar pirézidént donald trampning nopusining köp qismini musulmanlar igileydighan alte dölet puqralirigha qoyulghan wiza cheklimisini emeldin qaldurush üchün, fédératsiye sotigha iltimas sunushqa teyyarliniwatqanliqlirini élan qildi.
s n n (CNN) téléwiziyesining ziyaritini qobul qilghan haway ishtatining adwokatliridin nél katyal yéngidin imzalanghan pirézidént permanining konisigha qarighanda az kishige tesir körsitidighanliqidin xatirjem bolushni xalaydighanliqini bildürüp: «yéngi yolgha qoyulghan wiza belgilimisining konisidikige oxshash asasiy qanungha zit mesililiri bar» dédi.
haway ishtati bügün (8-mart) bu toghrida fédératsiye sot mehkimisige resmiy erz sunidu.
aqsaray élan qilghan pirézidént donald tramp imzalighan yéngi wiza cheklimisige munasiwetlik bayanatta, wiza cheklimisi qoyulghan döletlerning iran, süriye, somali, sudan, yemen we liwiye qatarliq döletler ikenliki, iraqning tizimliktin chiqirilghanliqi eskertilgen idi. buningdin bashqa bayanatta yene, amérikining töt ay boyiche héchqandaq dölettin musapir qobul qilmaydighanliqimu qeyt qilinghan idi.
pirézidént donald tramp imzalighan yéngi wiza belgilimisi 2017-yil 16-marttin bashlap resmiy ijra qilinidu.
donald tramp wiza cheklimisi yolgha qoyulidighan tunji pirézidént permanigha 2017-yil 27-yanwar imza qoyghan idi. mezkur perman imzalanghandin kéyin, washington ishtatidiki sotchi jéymés robért yette musulman döletning puqralirigha qarita yolgha qoyulghan wiza cheklimisini waqitliq toxtitish toghrisida höküm chiqarghan idi.
