süriye öktichiliri téximu köp qollashni telep qildi

türkiye awazi radiyosi xewiri: b d t süriye alahide wekili stéfan démistura öktichiler we beshsher esedning heyetliri ayrim-ayrim körüshti. körüshüshlerdin kéyin, öktichiler namidin axbarat élan qilish yighini ötküzgen nasir elhariri, démistura bilen diqqitini siyasiy ötkünchi mezgilge merkezleshtürüp, bu mesilini tepsiliy muzakire qilghanliqlirini bildürdi. u: «bizning nishanimiz bixeter we muqim bolghan süriye, zamaniwi süriye üchün uchrishishlirimizni dawamlashturimiz» dédi.

u démistura bilen yene qayta körüshidighanliqlirini we muzakire basquchining peqet b d t bilenla dawamlishalmaydighanliqini, shunga xelqaraliq jemiyetlerning téximu köp qollishi kéreklikini tekitlidi. u amérika hökümitidin bu basquchta ijabiy rol oynishini ümid qilidighanliqlirini, rusiyeningmu bu toghrida oxshash pozitsiyede bolidighanliqidin ümidwar ikenliklirini qeyt qildi.

u térrorluq teshkilati daéshning ishghali astidiki palmira qedimki shehirini qayturuwalghan beshshar esed hakimiyitini tebriklep-tebriklimeydighanliqi heqqidiki soalgha, mundaq jawab berdi:

«bundaq qilsaq, kéyinki waqitta daésh palmirani qayta qolgha kirgüzüwalsa, unimu tebrikleshke mejbur bolup qalimiz. her ikkisi oxshashla térroristtur. beshshar esedning palmira hiylisige qarisaq < tom müshük we jérriy chashqan> namliq qonchaq filimini körgendek bolimiz.»

démistura bilen körüshken beshshar esed hakimiyiti heyitining bashliqi jaferi, hökümet bilen öktichiler heyiti otturisida biwaste uchrishish éhtimali toghrisida toxtaldi. u öktichiler ittipaqlashqandin kéyin, bu éhtimalning peyda bolush mumkinlikini bildürdi. u démistura bilen körüshkende, siyasiy ötkünchi basquch hökümiti, yéngi asasiy qanun, saylam we térrorizm qatarliq mesililerning oxshash waqitta muzakire qilinishini telep qilghanliqlirini eskertti.

jaferi ichki urush partlighandin tartip hazirghiche qanche ademning hayatidin ayrilghanliqi heqqidiki soal qayta-qayta soralghan bolsimu, jawab bermidi. u: «qanche ademning ölgenlikini bilmeymen, qolimizda yéngi sanliq melumatlar yoq» déyish bilen kupayilendi.

jenwede b d t ning közitishi astidiki 4-qétimliq süriye söhbetliri 23-féwral bashlanghan idi. bu uchrishishtin kéyin, 14-mart qazaqistan paytexti astanada süriye uchrishishlirining bashlinishi kütülmekte.