tramp: rusiye toghrisidiki xewerlerning hemmisi yalghan

türkiye awazi radiyosi xewiri: amérika pirézidénti donald tramp peyshenbe (16-féwral) aqsarayda axbarat élan qilish yighini ötküzüp, hökümetning bir ayliq xizmitidin doklat berdi. u taratqular we öktichilerni hökümetning ishigha tosqunluq qilish bilen eyiblidi. pirézidéntliq hoquqini tapshuruwalghandin kéyin, tunji qétim özi yalghuz axbarat élan qilish yighini ötküzgen tramp, aléksandér akostani emgek ministirliqining namzatliqigha körsetkenlikini jakarlidi.

u saylam seperwerlik paaliyetliri qanat yaydurulghan mezgilde birlikte xizmet qilghan xadimlirining rusiyening istixbarat organliri bilen munasiwet ornatqanliqi toghrisida taratqularda tarqalghan xewerlerning yalghanliqini bildürdi. u öziningmu rusiye dairiliri bilen körüshmigenlikini we héchqandaq soda kélishimi tüzmigenlikini eskertti. u: «taratqulardiki yalghan xewerler kontrol qilghili bolmaydighan derijige yetti» dédi.

t r t world qanilining muxbiri jénifér glas washingtonda donald tramp ötküzgen axbarat élan qilish yighini toghrsida mundaq melumatlarni berdi:

«donald tramp: <rusiye ishigha chétilghan xewerlerdiki üch kishi bu ehwallarni pütünley ret qilidu. silerge bu ehwallarni özem chüshendürey؛ rusiyede héchqandaq mal-mülküm yoq, yaki alghan héchqandaq qerzim yoq, rusiye bilen tüzgen soda kélishimimu yoq. rusiye pirézidénti wladimir putin saylamda ghelibe qilghanliqimni tebriklep, téléfon qildi. aridin uzaq ötmey yene bir qétim téléfon qildi we resmiy xizmet bashlighanliqimni tebriklidi. bashqa barliq döletlerning rehberlirimu mushuninggha oxshash qildi. mana, rusiyening qilghanliri buningdin ibaret. rusiyege munasiwetlik tarqalghan xewerlerning hemmisi yalghan, yeni taratqular toqup chiqip, tarqatqan yalghanlardur.

men téléwizorni achqinimda we gézitlerge qarighinimda, köridighinim, qalaymiqanchiliqlar bayan qilinghan xewerler. biraq, heqiqiy ehwal del eksiche, hökümitimiz nahayiti inchike tengshelgen mashinigha oxshash ishlewatidu> dédi.»

muxbir jénifér glas yighin heqqide toxtilip, mundaq dédi:

«siler körgininglardek, trampning axbarat élan qilish yighini munazire bilen ötti. qalaymiqanchiliq yaki inchike tengshelgen mashina bolsun, yaki bolmisun, ishning ikki nuqtisidikilerning mesilige qandaq qarawatqanliqini nahayiti éniq körüwalalaymiz. bular bizni ishlarning qandaq boluwatqanliqi toghrisida pikirge ige qilidu. donald tramp axbarat organlirini rusiyege baghlap yalghan xewerlerni tarqitish bilen eyiblepla qalmastin, belki yene toghra bolmasliq we kontroldin chiqip kétish bilenmu eyiblidi. u özining urushqaq mijezini namayan qildi, kishi herqachan eng yaxshi qilalaydighan ishini qilidu, u özini amérika xelqige yene bir qétim körsetken boldi. axbarat élan qilish yighini 1 saet 15 minut dawamlashti, emma kishiler yighinning pütün jeryanini körmeydu, elwette. xelq pirézidéntining washingtondiki eng ilghar axbarat xadimliri déyiliwatqan kishilerge qopal muamile qilghanliqini kördi؛ mana mushunchilik. mundaqche éytqanda, tramp xalghinni qolgha keltürgen boldi. muxbirlar pirézidénttin konkrét jawab élishqa tirishti, biraq intayin ümidsizlendi. chünki pirézidént özining démekchi bolghanlirigha diqqetni burap turdi.»