méksika chégrasigha soqulidighan tamning pulini kim töleydu?

türkiye awazi radiyosi xewiri: donald tramp bilen méksika hökümiti otturisida, méksika chégrasigha soqulidighan tamning chiqimi toghrisida özara bir-birige qaritip bayanatlar élan qilindi. donald tramp twittérda hembehirleshken bir uchurida: «eger méksika jiddiy éhtiyaj chüshken bu tamning pulini töleshni xalmisa, aldimizdiki künlerde échilmaqchi bolghan yighinni emeldin qaldurush téximu yaxshi» dédi.

méksika hökümiti 31-yanwar washingtonda donald tramp bilen méksika pirézidéntini uchrashturidighan yighinning emeldin qaldurulush mumkinliki heqqidiki bayanatidin heyran qaldi. méksika pirézidénti énrik péna naytu bayanat élan qilip: «amérika pirézidénti bilen 31-yanwar ötküzüsh pilan qilinghan yighingha qatnashmaydighanliqimni bügün etigen aqsaraygha yetküzdüm. ikki dölet otturisidiki hemkarliqning dawamlishishi kéreklikige ishinimen» dédi.

donald tramp méksika pirézidéntining bayanatigha filadilfiyadin jawab qayturup: «méksika pirézidénti bilen men, aldimizdiki hepte ötküzülüshi pilan qilinghan yighinni emeldin qaldurush toghrisida pikir birliki hasil qilduq. amérikigha hörmet qilmighan méksika bilen bundaq yighinlarni échishning ünümi bolmaydu» dédi.

aqsaray bayanatchisi bolsa, amérika-méksika chégrasigha soqulmaqchi bolghan tamning pulini chiqirish üchün, trampning méksikidin import qilinghan barliq mallardin %20 baj élishni pilan qilghanliqini bildürdi. bayanatchi mezkur pilanning trampning saylam seperwerlik paaliyetliri jeryanida wede qilghan baj islahatining bir qismi bolidighanliqini eskertti.